DILI, 27 jullu 2023 (TATOLI)–Embaixadór Timor-Leste iha Japaun, Elídio Ximenes, hateten, Governu Japaun liuhosi Japan International Cooparation Agency (JICA) sei haruka mákina pezadu unidade 26 mai Timor-Leste fazeadamente.
“Tuir nota verbál, mákina pezadu unidade 26 ne’e sei haruka ba Timor-Leste fazeadamente, balun sei haruka faze dahuluk iha novembru 2023, tuir mai novembru 2024 no ikus marsu 2025. Ida-ne’e bazeia ba promediem hosi JICA no Governu Timor-Leste ne’ebé kontratu sei asina iha Timor-Leste fulan oin mai, rezultadu hosi fazeadamente ne’e haruka uluk mákina hira hafoin iha kontratu fulan oin mak hatene rezultadu,” Elídio Ximenes, hateten liuhosi nota komunikadu ne’ebé Agência Tatoli asesu, kinta ne’e.
Antes ne’e, Prezidente Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P), Hermenegilda da Costa Laurentina, ho ekipa hamutuk no konsultór hasoru empreza hodi diskute kona-ba prosesu no asina aseitasaun haruka sasán ba Timor-Leste bazeia ba nota verbál ne’ebé iha ona.
Notísia relevante : IGEADI, I.P sei hetan mákina pezadu unidade 26 hosi Governu Japaun
Nune’e, Diplomata ne’e agradese ba Governu Japaun nia apoiu tanba ajuda ona mákina pezadu ne’ebé Timor-Leste hetan la’os foin unidade 26 ne’e, maibé desde uluk kedas to’o agora Japaun sempre fó tulun ba povu no Governu Timor-Leste iha área oin-oin hanesan dezenvolvimentu no melloramentu sósiu ekonómiku, infraestrutura, promosaun ba diversifikasaun indústria no melloramentu ba dezenvolvimentu rekursu umanu.
Hafoin ukun-an iha tinan 2002, Governu Japaun ajuda ekipamentu pezadu hamutuk 100 hafoin misaun Peace Keeping Operation hosi Forca Defeza Japonés ramata iha Timor-Leste.
Hosi ekipamentu sira ne’e barak mak a’at ona no balun sei utiliza to’o agora. Haree ba nesesidade dezenvolvimentu ne’ebé iha mak IGEADI, I.P halo kooperasaun ho Embaixada Timor-Leste iha Japaun hodi hato’o proposta ba Governu Japaun liuhosi JICA hodi hetan tulun.
Jornalista : Arminda Fonseca
Editora : Julia Chatarina
