COVALIMA, 27 jullu 2023 (TATOLI)— Korpu Guarda Floresta Munisípiu Covalima, Simplício Magno Soares hateten, Korpu Guarda Floreste iha munisípiu Covalima sei menus fasilidade patróliamentu inklui laiha transporte, komputadór no radio komunikasaun hodi fasilita hala’o servisu lor-loron.
“Ami nia preokupasaun durante ne’e sei menus fasilidade hodi halao patróliamentu. Ami laiha transporte nune’e uza de’it motorizada privadu hodi hala’o patróliamentu. Nomos, laiha radio komunikasaun, ekipamentu seguransa no komputadór inklui printer no konbustivel. Laos ne’e deit, Korpu Guarda Floresta Munisípiu Covalima mos la orsamentu atu halo manutensaun ba kareta,” Korpu Guarda Floresta Munisípiu Covalima, Simplício Magno Soares, dehan ba jornalista sira iha ninia servisu fatin, Kampung-baru, Covalima, kinta ne’e.
Nia dehan, Guarda Floresta presija tebes transporte nune’e bele hala’o kontrola ba sidadaun sira ne’ebé tesi ai maibe laiha lisensa husi floresta munisípiu Covalima.
Nia mos hatutan tan katak, maske Korpu Guarda Floresta Covalima laiha fasilidade maibé ida-ne’e la hamate espiritu ba Korpu Guarta Floresta hodi hala’o kontrola ba sidadaun sira ne’ebé koa ai maibe laiha lisensa.
Ho nune’e Guarda floreste ne’e husu ba governu atu sosa ekipamentu ba Korpu Guarda Floresta sira atu bele hala’o patróliamentu hodi kontrola sidadaun sira.
Nune’e mos Xefi Departamentu Reprezentasaun Territóriál Floresta Planta no Indústria Covalima, Francisco Sarmento rekoñese Korpu Guarda Floresta Covalima sei menus fasilidade hanesan, laiha transporte, komputadór konbustivél no la iha orsamentu atu halo manutensaun ba kareta.
“Korpu Guarda Floresta Covalima maioria hala’o patróliamentu uza transporte privadu hodi halo kontrolu ba sidadaun ne’ebé tesi ai laiha lisensa husi Floresta Covalima no meius komunikasaun hanesan radio komunikasaun,” nia esplika.
Konaba ba problema ne’e hanesan Xefi Departamentu hato’o ona proposta ba Governu maibé to’o ohin loron seidauk iha rezultadu maibe Korpu Guarda Floresta nafatin hala’o servisu.
Tuir dadus funsionáriu ne’ebé servisu iha Floresta Covalima hamutuk 39, korpu Guarda Floresta 28 mai hosi funsionáriu públiku no funsionáriu kazoál.
Jornalista : Celestina Teles
Editóra : Armandina Moniz
