DILI, 27 jullu 2023 (TATOLI)- Autoridade seguransa, liliu Polísia Nasionál Timor-Leste (PNTL), Komandu Munisípiu Dili, detein ona suspeitu sira ne’ebé durante ne’e hadau ema nia telefone iha Dili laran. Suspeitu sira ne’ebé PNTL detein ne’e hamutuk na’in hitu, maioria ho otas foinsa’e. Alende suspeitu na’in hitu ne’e, inklui mós suspeitu na’in rua tanba kaer subar komunidade nia animál.
Suspeitu sira ne’e ekipa unidade Intelejénsia asegura iha fatin la hanesan iha área Díli laran, iha kuarta (26/7) kalan.
Suspeitu na’in hitu ne’ebé mak ekipa konjunta asegura mak ho insiál hanesan, SMS,VBDG,FCMX, DSCS, YDKS, ZMSX no DFAR.
Komandante PNTL, Munisípiu Dili, Superientendente Xefe Polísia, Orlando Pereira Gomes liuhosi Konferénsia Imprensa, informa katak kazu ema foti sasán iha fatin-fatin liliu iha kapitál Dili, hahú husi loron 1 to’o 25 jullu 2023.
“Ita simu keixa lima hosi ita-nia sidadaun sira no ita halo kedan prosesu. Agora daudaun ita asegura ona ema na’in hitu ne’ebé halo asaun (Hadau no foti subar, red) sira ne’e hanesan telefone no sasan sira seluk. Suspeitu sira ne’e submete ona ba prosesu identifikasaun no agora suspeitu sira ne’e ita detein ona iha sela Komandu Munisipiu Díli,” Komandante PNTL Munisípiu Díli, Superientendente Xefe Polísia, Orlando Pereira Gomes, hateten, iha Komandu PNTL Dili, Caicoli, kinta ne’e.
Autoridade másima PNTL munisípiu Dili ne’e, informa, suspeitu sira ne’e, ekipa unidade intelénjsia ka’er iha fatin la hanesan iha área Díli laran fora husi flagrante delitu. No, submete ona ba prosesu investigasaun no asegura ona sela Komandu PNTL Díli.
“Suspeitu sira ne’e nu’udar grupu organizadu ne’ebé konsentra iha Dili ne’ebé maka halo sira-nia asaun iha fatin ketak ketak, maibé liuhosi planu no jestaun operasaun ne’ebé Komandu PNTL Díli halo no hetan tulun hosi servisu intelejénsia sira, deteta suspeitu sira-nia fatin no ita konsege asegura ona supeitu sira,” nia informa.
“Sira agora ita asegura hodi hein prosesu tuirmai tanba sira ne’e ita asegura fora fraglante delitu,” nia realsa.
Orlando esplika, modus ne’ebé mak suspeitu sira ne’e uza mak sira ho motorizada rua halai besik sidadaun sira ne’ebé ho motór sira ida tenta halao asaun hodi hadau telemovél ne’ebé tau hela iha motór oin bainhira sira hadau tiha sasan sira ne’e, depois mak suspeitu sira ne’e halai.
Nia haktuir, evidénsia sira ne’ebé suspeitu sira uza hodi halo asaun ne’e Komandu PNTL Díli asegura hotu ona, iha motorizada lima ho tipu Scoppy ida no Beat haat. Inklui, agora daudaun ne’e mós PNTL asegura telefone lima ne’ebé suspeitu sira hadau hosi komunidade.
“Komandu PNTL Díli sei la nonok no sei kontinua intensifika liután hodi halo planu operasaun , iha tempu kalan liuhosi la’o ain tama sai bairru risku sira iha Díli laran atu nune’e prevé asaun krimi sira hanesan,” Superientendente Xefe Polísia Orlando afirma.
“Parte unidade sei intelensia kontinua buka tuir hodi indentifika suspeitu sira seluk komete krimi sira hanesan ne’e, tanba tuir prosesu investigasaun ne’ebé mak Komandu PNTL halo ba suspeitu sira ne’e sei iha tán suspeitu sira seluk ne’ebé envolve kazu hanesan,” nia hatutan.
Komandante Munisípiu PNTL Díli ne’e hateten , PNTL sei la tolera asaun ne’ebé mak suspeitu sira halo hodi hatauk komunidade sira, nune’e sei intensifika operasaun hodi kontinua halo operasaun prevene aktu krimi sira hanesan ne’e, kuandu hetan tán suspeitu balun tán hanesan ne’e sei lori hotu sira mai iha Komandu Díli hodi submete ba prosesu.
Detein suspeitu na’in rua kaer suba komunidade nia asu
Iha biban ne’e, Komandante PNTL Munisipiu Díli ne’e, Superintendente Xefe, Orlando Gomes, informa, ekipa konjunta unidade intelejénsia sira asegura suspeitu na’in rua seluk ne’ebé halao asaun hodi foti subar komunidade nia animál iha área Audian.
Ekipa unidade intelejénia sira asegura iha kinta (28/7) dadeer iha sira-nia rezidénsia.
Nia dehan, suspeitu sira ne’e submete ona ba iha prosesu investigasaun no detein ona iha sela detensaun durante oras 72 molok submete ba prosesu legál.
Jornalista :Natalino Costa
Editór : Rafael Ximenes de A. Belo
