DILI, 27 jullu 2023 (TATOLI)—Prezidente Parlamentu Nasionál, Maria Fernanda Lay, husu mídia Estatál Agência Tatoli, Institutu Públiku (TATOLI, I.P) kontinua fó sai notísia iha proporsionalidade ho faktu no evidénsia iha terrenu.
Notísia Relevante: TATOLI horisehik no ohin
“Ha’u-nia mensajen katak, ho tinan hitu ezisténsia, ha’u espera idade aumenta, TATOLI sai adultu. Maibé, tanba se idade labarik, ha’u espera katak, notísia ne’ebé ita-boot sira hatun ne’e iha proporsionalidade ho evidénsia, faktu iha terrenu, ne’ebé saida mak ema ko’alia, ida-ne’e mak ita-boot sira hakerek, se lae ema lakohi lee ita-boot sira ninia notísia ka asuntu sira. Ha’u fó parabéns maibé ho rekomendasaun ne’ebé ha’u hato’o tiha ona,” Prezidente Parlamentu Nasionál, Maria Fernanda Lay, hateten ba Agência Tatoli relasiona ho aniversáriu Agência TATOLI, I.P ba dala-hitu (7) ne’ebé komemora iha loron 27 jullu tinan ne’e.
Tambá ne’e, nia fó hanoin, jornalista sira hakerek notísia ho proporsionalidade no evidénsia no faktu, tanba ho ida-ne’e mak loos.
Durante ne’e, Prezidente Parlamentu Nasionál ne’e akompaña notísia publikadu sira iha portál Agência Tatoli di’ak tebes no oinsá mak ba oin kontinua nafatin fó sai notísia ho proporsionalidade, nune’e sani-na’in sira hakarak tebes atu lee,
“Iha jornál balun ha’u lakohi lee, tanba liafuan la’ós ha’u nian ba tau iha ne’eba. Maibé, notísia maiória ha’u lee hotu inklui TATOLI ninian, ne’ebé dala ita tan ha’u espera TATOLI hadi’a nia redasaun no nia matéria ne’ebé ita-boot sira aborda sei lori ema barak atu atrai, nune’e ema bele lee ita-boot sira-nia notísia,” nia hateten
Notísia Relevante: MAPKOMS husu TATOLI públika informasaun lais, loloos no kredivél
Jornalista : Nelson de Sousa
Editór : Cancio Ximenes
