SEKOMS kompromete fó prioridade ba infraestrutura TATOLI,I.P
DILI, 27 jullu 2023 (TATOLI) – Sekretáriu Estadu Komunikasaun Sosiál (SECOMS, sigla portugés) Expedito dias Ximes, hateten iha tinan lima nia-laran Governu sei esforsu hodi tau prioridade ba konstrusaun edifísiu Agência TATOLI, IP atu fó kondisaun ba funsionáriu tomak hosi halo funsaun ne’ebé di’ak hodi garante informasaun ba públika.
“Tatoli tenke iha fatin ne’ebé digñu, labele hanesan agora ne’e. Ita sei buka hela, la signifika katak IX Governu fila liman halo kedan milagre, ohin loron ne’e buat hotu prontu ona lae? maibé pelumenus ita esforsu iha tinan lima nia-laran, ne’e Tatoli labele hanesan Tatoli ida agora”, Expedito dias Ximes afirma bainhira partisipa iha talk show ho tema investimentu no dezenvolvimentu mídia Timor-Leste iha ámbitu aniversáriu Agência TATOLI ba dala hitu ne’ebé hala’ iha edifísiu TATOLI, IP Farol, kinta ne’e.
Governante ne’e hateten, SEKOMS sei fó prioridade ba TATOLI atu sai hanesan Agência ofisiál Estadu Timor-Leste nian tuir Estatutu TATOLI nian.
Tanba, durante ne’e governante ne’e observa katak ezisténsia TATOLI iha difikuldade maske hala’o ona funsaun hanesan mídia estatál.
“To’o ohin, buat ne’ebé TATOLI seidauk halo no sei sai hanesan dezafiu ba TATOLI mak TATOLI seidauk halo nia kna’ar loloos hodi sai fonte ofisiál Estadu no hanesan informasaun Clearing House ba mídia sira seluk, ne’ebé mak deskreve iha Estatutu TATOLI nian”, nia akresenta.
“Governu konsiente ida ne’e. Iha IX Governu, iha lideransa ha’u nian, ha’u buka atu halo Tatoli sai duni saida mak iha nia estatutu”, Expedito afirma.
Expedito husu ba Konsellu Diretiva TATOLI ho nia funsionáriu hotu TATOLI nian hodi buka halo reflesaun hamutuk no kontinua servisu hodi fó informasaun ne’ebé di’ak ba públiku.
Nia hatutan, iha polítika IX Governu iha área Komunikasaun Sosiál ne’ebé aprezenta ona iha Parlamentu, Governu tau prioridade primeiru ba mídia estatál rua mak TATOLI no RTTL, nomeadamente infraestrutura sira atu oinsá kontinua oferese informasaun ba públika.
“Programa Governu liuliu iha área Komunikasaun Sosiál iha prioridade 13 maibé prioridade primeiru ba mídia Estatál rua TATOLI no RTTL EP oinsa atu dezenvolve mídia Estadu rua ne’e di’ak liután atu garante informasaun ba públiku ho kualidade”, nia revela.
Aleinde ne’e, SEKOMS mós la haluha mídia sira seluk oinsá atu fó apoiu liuhosi formasaun no kapasitasaun hodi bele hasae abilidade jornalista sira nia atu bele halo servisu di’ak liután.
Jornalista: Natalino Costa
Editór : Zezito Silva
