LAUTÉM, 27 jullu 2023 (TATOLI) – Sekretáriu Estadu Koperativa kinta ne’e, lansa programa kuda Bafo Kay Rala (sorgum) iha suku Fuiloro, postu administrativu Lospalos, munisípiu Lautém.
Sekretáriu Estadu Koperativa, Arsenio Perreira, esplika, IX governu Konstitusionál liuhosi SEKoop trasa planu fó prioridade ba grupu kooperativa iha setór agríkola liuliu Bafo Kay Rala no boa governasaun.
“Bafo Kay Rala bainhira kombina hamutuk bele iha karbohidrat, vitamina no minerál sei redus má-nutrisaun iha Timor-Leste,” Sekretáriu Estadu Koperativa hateten iha Suku Fuiloro.
Arsenio Perreira argumenta, inísiu simu pose hahú kedas koordena ho grupu koperativa Mokatil hodi kontinua programa Bafo Kay Rala ne’ebé durante tinan-tolu paradu relasiona programa SEKoop iha VIII Governu Konstitusionál.
Nune’e SEKoop sei koordena ho liña ministeriál sira hanesan Ministériu Agrikultura, Peska, Pekuária no Florestrál (MAPPF) hodi haree aspeitu infraestrutura inklui ekipamentu, Ministériu Saúde foka ba redusaun má-nutrisaun inklui Ministériu Edukasaun iha programa merenda eskolár.
“Lautém área ne’ebé di’ak ba turismu, Agrikultura, pekuária no peska, ha’u hanoin ho buat hirak-ne’e bele kontribui ba dezenvolvimentu iha setór kooperativa,” Arsenio Perreira akresenta.
Primeiru Vise Prezidenti nasionál Movimentu Kamponezes Timor-Leste (Mokatil), Manuel Perreira Araujo, hateten, polítika no programa Mokatil iha tempu ukun IX governu hahú alerta ona ba membru hotu atu hahú lansa no kuda Bafo Kay Rala iha territóriu nasionál.
“Tempu to’o ona atu Mokatil alerta to’os nain-hotu atu hahú hikas atividade ba munisípiu hotu,” Manuel Araujo argumenta.
Bafo Kay Rala rasik alende sai hahaan aternativa hanesan foos, uza mós ba produsaun doxe inklui coklat no benefísiu ba produsaun ai-haan animál liuliu bainhira Sorgum halo komparasaun ho foos ho valór nutrisaun hanesan kalori sorgum 332 kompara ho foos 360, proteína sorgum 11, enkuantu foos 7, lemak hosi sorgum 3.30 no foos 6.70.
Totál to’os hodi kuda Bafo Kay Rala iha suku Fuiloro, postu administrativu Lospalos hamutuk ektare 36 ne’ebé implementa hosi grupu Mokatil munisípiu Lautém.
Jornalista : Natalino Belo
Editór : Evaristo Soares Martins
