DILI, 28 jullu 2023 (TATOLI)—Ministru Komérsiu no Indústria, Filipus Nino Pereira, tun direta hodi observa kondisaun merkadu Manleuana no rona hanoin hosi vendedór sira ne’ebé durante ne’e fa’an produtu iha merkadu ne’e.
Hafoin halo observasaun, governante ne’e nota katak merkadu Manleuana organizadu tanba iha jestór hodi kontrola inklui seguransa. Maski nune’e, infraestrutura sira hanesan haris-fatin, no seluk tan ne’ebé Governu instala, balun hahú a’at ona.
“Kontente tanba merkadu Manleuana organizadu tanba iha pesoál limpeza, estrutura di’ak, importante liu maka ema la hela iha fatin ne’e, loos duni merkadu fatin atu fa’an sasán de’it, la’ós fatin atu hela, ida-ne’e sira kumpre, jestór sira ne’e halo servisu di’ak atubele organiza vendedór sira labele hela iha merkadu, kompara ho merkadu seluk vendedór hela permanente iha merkadu. Tanba ne’e maka bele asegura nafatin merkadu Manleuana bele sai ezemplu ida ba merkadu sira seluk,” Ministru hateten hafoin vizita merkadu Manleuana, sesta ne’e.
Notísia relevante : AMD sei muda negosiante faan iha estrada públiku ba merkadu Manleuana
Nia dehan, Governu planeia ona atu espande merkadu Manleuana tanba vendedór barak fa’an iha dalan ninin hanesan iha área Elembloi no Kampung Baru, nune’e mós bele akumula vendedór ikan. Daudaun espasu la sufisiente hodi akumula hamutuk vendedór sira, tanba ne’e maka atu asegura sira ne’ebe fa’an iha Elembloi no Kampu baru.
Razaun Ministru vizita merkadu ne’e hodi haree direta kondisaun merkadu no rona hanoin hosi vendedór, jestór merkadu rasik no membru sira ne’ebé servisu direta hodi asegura atividade negósiu. Aleinde ne’e rona mós hanoin hosi ekipa jestaun merkadu munisípiu Dili.
“Fatin merkadu ne’e esensiál tebes tanba ita-nia roda ekonomia sirkula iha baze, tuir dadus katak vendedór iha merkadu Manleuana hamutuk 1.000 resin. Ita haree kondisaun la apropriadu atubele uza, hanesan haris-fatin barak mak estraga, daudaun utiliza ida de’it, fatin ne’ebé tuir loloos uza fa’an modo maibé tanba ema la sosa entaun sira okupa fali fatin seluk iha areadór merkadu. Kestaun seguransa mós sai preokupasaun vendedór sira tanba sasán balun lakon tanba de’it fasilidade balun la kompletu tanba laiha iluminasaun iha fatin refere,” nia haktuir.
Governante ne’e konsidera preokupasaun sira hosi vendedór pertinente tebes hodi nune’e bele halo koordenasaun ida, tanba liuhosi koordenasaun ho Autoridade munisípiu Dili, maski jestaun merkadu ne’e iha PAM Dili nia okos maibé ministériu nafatin fó orientasaun tanba bele kria nafatin ambiente negósiu saudável.
Biban hanesan, Tékniku Espesializadu, Jestaun Merkadu no Turizmu munisípiu Dili, Luizino da Costa, hateten, presiza tau osan hodi halo manutensaun ba merkadu.
“Problema merkadu ne’e problema Estadu nian mós, Autoridade munisípiu Dili hetan kompeténsia hosi Ministériu Turizmu, Komérsiu no Indústria iha Governu anteriór hodi entrega merkadu ne’e mai ho kondisaun hanesan ne’e, ne’ebé bainhira ami tama ami haree orsamentu ba jestaun merkadu laiha, daudaun prevee ona iha orsamentu retifikativu ba merkadu rua (Manleuana no Taibesi) hodi rezolve infraestrutura merkadu,” nia dehan.
Luizino da Costa argumenta, kolokasaun merkadu rua ho nia tipu infraestrutura la hanesan, tanba ko’alia kona-ba vendedór Dili hanesan kapitál nasaun.
“Tanba ne’e Manleuana no Taibesi tuir tranzisaun no kondisaun merkadu ne’e ita haree organizadu,” nia tenik.
Antes ne’e, Prezidente Autoridade Munisípiu (PAM) Dili hatudu ona rai ne’ebé Governu anteriór sosa ona ba Ministru Komérsiu no Indústria maibé to’o agora la rezolve, tanba ne’e sujere atu IX Governu bele aselera tanba ko’alia kona-ba vendedór sira ne’ebé fa’an iha dalan ninin, tenke kria fatin no prevee osan boot hodi hadi’a infraestrutura.
Jornalista : Antónia Gusmão
Editora : Julia Chatarina
