Pagamentu benefisiáriu “bolsa da mãe jerasaun foun” iha Covalima finaliza ona
COVALIMA, 28 jullu 2023 (TATOLI)– Governu liuhosi Ministériu Solidariedade Sosiál no Inkluzaun (MSSI) liuhosi husi kompañia Mosan finaliza ona halo pagamentu ba benefisáriu bolsa da mãe jerasaun foun iha Covalima.
Notísia Relevante: Governu hahú rejista benefisiáriu bolsa da mãe jerasaun foun iha Covalima
“Pagamentu bolsa da mãe jerasaun foun iha fulan-marsu ba benfisiáriu sira iha Covalima finaliza ona no kompañia Mosan entrega ona relatóriu ba Sentru Solidadsiedade Sosiál no Inkluzaun iha Covalima,” Pontu Fokál Bolsa da Mãe Jerasaun Foun, Nelson de Jesus, hateten ba Agência Tatoli iha nia kna’ar fatin Suai Loro, sesta ne’e.
Programa bolsa da mãe jerasaun foun mak programa asisténsia sosiál ne’ebé estabelese ho dekretu-lei númeru 22/2021, loron 10 novembru.
Benefisiáriu ba programa bolsa da mãe jerasaun foun hanesan inan isin-rua no labarik sira ho tinan 0-3 mak simu pagamentu ba subsídiu asisténsia sosiál hodi hadi’a saúde no nutrisaun iha Covalima.
Prosesu pagamentu no alvu pagamentu faze daruak ba programa bolsa da mãe jerasaun foun fasilita liuhosi kompaña Mosan, maibé pagamentu faze dahuluk pagamentu fasilita hosi kompañia Telin Ka T-PAY.
Programa bolsa da mãe jerasaun foun mak programa transferénsia osan hosi sistema asisténsia sosiál ne’ebé kompostu ba subsídiu ba inan isin-rua $15.00 kada fulan durante períodu kous kada fulan $20.00, ba labarik tinan 0-3 sei kontinua to’o labarik tinan neen ho suplementu adisionál $10.00 bainhira labarik moras króniku ka defisiénsia.
Tuir kalendáriu ne’ebé kompañia Mosan hala’o pagamentu iha loron 6-17 fulan-juñu tinan 2023, hala’o pagamentu iha sentru saúde no postu saúde ne’ebé estabelese iha postu administrativu Suai.
Pagamentu ba benefisiáriu bolsa da mãe jerasaun foun iha postu administrativu Maucatar hahú iha 19-22 fulan-juñu tinan 2023.
Iha loron 23-26 fulan-juñu iha sentru saúde no postu saúde ne’ebé estabelese iha postu administrativu Tilomar.
Iha sentru saúde no postu saúde ne’ebé estabelese iha postu administrativu Zumalai hahú iha loron 24-30 fulan-juñu no loron 1-4 fulan-jullu. iha sentru saúde no postu saúde ne’ebé estabelese iha Fohorem hahú pagamentu iha loron 5-7 fulan-jullu tinan 2023.
Sentru saúde no postu saúde ne’ebé estabelese iha postu administrativu Fatumea hahú pagamentu iha loron 10-12 fulan–jullu no sentru saúde Fatululik iha postu saúde Beidasi hahú iha loron 13-14 fulan-jullu tinan ne’e.
Entretantu, Governu hala’o abertura pagamentu bolsa da mãe jerasaun foun iha munisípiu Covalima iha sentru saúde Suai, munisípiu Covalima, iha loron 6 fulan-juñu tinan 2023.
Jornalista : Celestina Teles
Editór : Cancio Ximenes
