PN hein Governu aprezenta proposta Orsamentu Retifikativu
DILI, 28 jullu 2023 (TATOLI)—Parlamentu Nasionál (PN) hein IX Governu Konstituisionál aprezenta proposta Orsamentu Retifikativu (OR) ba tinan 2023 hodi bele hala’o debate.
Notísia Relevante: 10 agostu, Governu submete proposta Orsamentu Retifikativu bá PN
Sekretária Meza Parlamentu Nasionál, Deputada Virginia Ana Belo, hateten tuir Primeiru-Ministru (PM) hateten iha loron 10 fulan-agostu, IX Governu Konstitusionál sei aprezenta OR ba PN.
“Ne’e tentativa ida, Governu aprezenta agora daudaun sira prepara hela proposta Orsamentu Retifikativu. Hanoin, horsehik, saida mak ita-boot sira akonpaña Primeiru-Ministru ko’alia ona tetu orsamentu billaun $2.1 Governu hanoin hela atu hatun tan uitoan tan, tanba konsidera boot uitoan,” nia hateten ba jornalista sira iha PN, sesta ne’e.
Maibé, nia dehan, ho governasaun ida agora iha mudansa balun aumenta tan sekretária Estadu no vise Ministru nune’e sira bele halo ajustamentu, hein tempu badak sei planu Governu tentativa 10 agostu sira submete ona Orsamentu Retifikativu.
Nia dehan, Governu nia aprezenta karik ho karáter urjénsia maibé mai mós ho pakote alterasaun lei enkuadramentu orsamentál, entaun karik altera de’it artigu ida ka rua hanoin debate ne’e la presiza tempu barak.
“Ne’ebé, se mai ho karáter urjénsia, Prezidente Parlamentu mós husu ona se Governu iha hanoin alterasaun iha artigu balun di’ak ka barak tenke haketak Orsamentu Retifikativu. Depois ba alterasaun ba lei enkuadramentu orsamentál mai iha tempu seluk, maibé se alterasaun artigu ida ka rua entaun bele hamutuk,” nia hateten.
Nune’e, se mai ho karáter urjénsia debate ne’e Parlamentu Nasionál (PN) bele hala’o durante loron haat (4t, no molok debate sei tama ba audiénsia públika karik iha mudansa presiza ho Ministéiru Finansa loron ida.
Jornalista : Nelson de Sousa
Editór : Cancio Ximenes
