PN sei aplika sesaun plenária ho dalen portugés

DILI, 28 jullu 2023 (TATOLI)—Sekretária Meza Parlamentu Nasionál, Deputada Virginia Ana Belo, hateten sei aplika sesaun plenária ho dalen portugés kada fulan ida dala tolu ne’ebé sei hahu iha inísiu fulan-agostu tinan ne’e.
“Ohin, iha reuniaun líder bankada iha diskusaun reprezentante bankada sira oinsá dezenvolve língua portugeza, liuliu iha sesaun plenária ne’ebé tau iha ajenda kada fulan ida sei hala’o dala tolu, ne’ebé sei hahú iha inísiu fulan-agostu,” nia hateten ba jornalista sira hafoin ramata reuniun lidér bankada Parlamentár ne’ebé prezide direta hosi Prezidente Parlamentu Nasionál, Maria Fernanda Lay, iha sala konferénsia PN, sesta ne’e.
Aplika plenária ho sesaun língua portugés ne’e hodi hasa’e liután kapasidade ho koñesimentu Deputadu sira-nian iha área lingua portugeza, nune’e nia da’et ba sosiedade tomak.
PN tenke sai ezemplu hodi ema hotu bele tuir, tanba konstituisaun rekoñese katak língua portugés ho tetun sai hanesan língua nasionál.
“Hakarak ka lakohi, ita hahú promove língua rua ne’e liuliu portugés,” nia hateten.
Hatán kona-ba iha k alae sansaun bainhira Deputadu sira iha plenária sesaun portugés mak Deputadu sira hato’o intervensaun ho fali ho lian tetun. Nia hatán, kestaun ne’e ohin iha reuniaun lidér bankada ko’alia mós.
“Agora, bankada FRETILIN husu se intervensaun ho língua tetun husu Prezidente tenke hamate, ne’ebé ita koko took. Prezidente dehan, ha’u lakohi halakon Deputadu sira-nia direitu, maibé ita pronúnsia se sira labele hato’o hanoin meiu barak asesór sira mós iha se hakarak aprezenta buat ruma bele haruka asesór sira prepara hela depois ita ba lee,” nia dehan.
Sekretária Meza PN ne’e hateten, tuir meza nia haree atuál Deputadu sira iha lejislatura daneen ne’e iha koñesimentu di’ak kona-ba língua portugés, tanba barak mai hosi professor no balun funsionáriu públiku.
Enkuantu, tuir rejimentu Parlamentu Nasionál nian ne’e sei hala’o reuniaun plenária iha loron segunda no tersa kada semana.
Jornalista : Nelson de Sousa
Editór : Cancio Ximenes

