Deputada FRETILIN lamenta oknum membru F-FDTL halo agresaun fíziku hasoru komunidade
DILI, 31 jullu 2023 (TATOLI)—Deputada bankada Frente Revolucionária de Timor-Leste Independencia (RETILIN) iha Parlamentu Nasionál (PN), Sanchia Paixão Bano, lamenta ho oknum membru FALINTI-Forsa Defeza Timor-Leste (F-FDTL) hala’o agresaun fíziku hasoru komunidade balun iha Rejiaun Administrativu Espesiál Óe-Cusse Ambeno (RAEOA).
“Iha semana kotuk, iha akontesimentu ida-ne’ebé envolve oknum forsa naval-terrestre nian iha RAEOA ne’ebé mak baku joven no ajente polísia ida iha festa laran, envolve oknum ka indivídu forsa F-FDTL,” nia levanta liuhosi reuniaun plenária PN, segunda ne’e.
Informasaun ne’e, nia-parte hato’o ona komandante balun iha instuituisaun F-FDTL no situasaun ne’e hatauk tebes komunidade sira ne’eba, tambá joven sira iha RAEOA laiha hanoin atu halo asaun ruma ne’ebé hasoru oknum membru F-FDTL.
Tanba ne’e, nia husu ba superiór másimu instituisaun atu tau atensaun no prosesa oknum membru F-FDTL tuir regra dixiplinár.
“Hosi parte defeza fó lisensa ka lae, ba sira-nia membru balun ne’ebé uza farda no kilat kompletu tama iha festa laran, husu atu parte defeza atu haree no ekipa investigasaun atu bele tun direta,” nia hateten.
Deputadu FRETILIN, David Dias Ximenes ‘Mandati’, mós sekunda presiza haree membru oknum balun ne’ebé deskonfia komete aktu refere.
Hatán ba preokupasaun ne’e, Vise Ministru ba Asuntu Parlamentár, Adérito Hugo, hateten kona-ba kestaun militár nian ho atributu militár iha serimónia kazamentu ka festa sei halo andamentu ba Ministéiru Defeza hodi bele hato’o resposta inklui regra dixiplinár ne’ebé introdús ona ba iha membru F-FDTL sira, tanba iha regra disiplinár.
Jornalista : Nelson de Sousa
Editór : Cancio Ximenes
