COVALIMA 31 jullu 2023 (TATOLI)–Komunidade aldeia Tobur, suku Beco, postu administrativu Suai, munisípiu Covalima seidauk asesu eletrisidade hahú hosi tempu okupasaun Indónezia to’o Timor-Leste hetan independénsia, nune’e provizóriamente komunidade uza de’ it solár panel.
“Ami komunidade preokupa tanba hahú okupazaun Indónezia to’o ohin loron seidauk asesu eletrisidade, nune’e ami provizóriu sei uza solár panel ne’ebé depende de’it ba loron matan. Maibé, tempu udan solár panél la lakan no ami uza de’it lampu tradisionál,” Komunidade aldeia Tobur, Januario Taseo, hateten ba ba Agência Tatoli iha Tobur, segunda ne’e.
Tanba ne’e, nia husu IX Governu Konstitusionál atu dada liña eletrisidade ba komunidade iha Tobur tanba hahú okupasaun Indonézia to’o ohin loron, komunidade seidauk asesu eletrisidado np uza de’it solár panél ne’ebé depende de’it ba loromatan maibé bainhira tempu udan sei kontinua sunu lampu tradisionál.
Xefe aldeia Tobur, Francisco Bandido, rekoñuse komunidade aldeia Tobur hahú okupasaun indónezia to’o ohin loron la asesu eletrisidade, nune’e komunidade uza de’it solár panel.
“Ha’u-nia komunidade iha aldeia tobur seidauk asesu eletrisidade hahú okupazaun Indonézia to’o ohin loron, ha’u-nia komunidade uza de’it solár panel kalan bele naroman,” nia dehan.
Lideransa komunitária ne’e dehan, komunidade ne’ebé hela iha área rurál seidauk sente ukun aan, tanba to’o ohin loron komunidade sei moris iha nakukun laran.
Aleinde komunidade seidauk asesu eletrisidade, nia mós informa komunidade seidauk asesu estrada liga hosi Suai ba aldeia Tobur.
Tanba ne’e, husu ba IX Governu Konstitusionál atu dada eletrsidade ba komunidade Tobur nune’e komunidade bele asesu eletrsidade.
Aldeia Tobur pertense ba suku Beco, oostu administrativu Suai, munisípiu Covalima ho nia xefe família 67 ho totál populasaun hamutuk 450.
Jornalista : Celestina Teles
Editór : Cancio Ximenes
