Kondisaun Eskola Bázika Filiál Tobur grave
COVALIMA, 31 jullu 2023 (TATOLI)–Koordenadór Eskola Bázika Filiál (EBF) Tobur, João Magno, reforsa, hateten kondisaun Eskola Bázika Filiál (EBF) ne’ebé grave ne’e hato’o ona proposta no loke ona konta bankária maibé to’o ohin loron seidauk hadi’a.
“Eskola EBF Tobur grave tanba impaktu hosi dezastre naturál anin sobu eskola iha 2015 to’o ohin loron seidauk rekonstrui. Nune’e, ami kontinua uza eskola refere hodi hala’o prosesu aprendizajen,” Kootrdenadór EBF Tobur ne’e hateten ba Agência Tatoli iha resintu eskola EBF Tobur, segunda-ne’e.
Eskola EBF Tobur ho nia sala-de-aula tolu, ne’ebé daudaun ne’e eskola uza de’it sala-de-aula rua tanba sala-de-aula ida labele uza tanba anin sobu kalen to’o ohin loron seidauk taka fila-fali hodi nakloke luan de’it.
Aleinde kondisaun eskola grave, EBF Tobur mós laiha tolilet, nune’e estudante sira atu soe bee kiik no boot ba de’it ai-laran fuik no eskola la asesu bee-moos, nune’e estudante sira lori bee hosi uma ba eskola hodi uza ba fase liman.
Estudante iha eskola Bázika Filiál (EBF) Primeiru ano to’o sesta ano uza de’it sala-de-aula rua ba prosesu aprendijazen ensinu ho totál estudante 31 no ho profesór permanente na’in-tolu.
Eskola Bázika Filiál (EBF) Tobur ne’ebé lokaliza iha suku Beco, postu administrativu Suai, munisípiu Covalima ne’e, hosi primeiru ano to’o sestu ano, daudaun ne’e uza de’it sala-de-aula ida tanba kondisaun eskola grave no iha tempu udan sala-de-aula nakonu ho tahu.
“Ami-nia kondisaun eskola Tobur ladun seguru, tanba kondisaun eskola grave, kalen kuak nune’e bainhira tempu udan ami labele hala’o prosesu aprendijazen ho seguru,” Estudante Indriana Cardoso hateten iba Agência Tatoli,
Estudante ne’e husu Governu atu hadi’a eskola, nune’e estudante sira bele hala’o prosesu aprendijazen ho seguru.
Jornalista : Celestina Teles
Editór : Cancio Ximenes
