DILI, 31 jullu 2023 (TATOLI)—Prezidente Repúblika (PR), José Ramos Horta, sesta (28 jullu) ne’e, entrega uma meia-parede inklui kioske no fahi-luhan ne’ebé konstrui hosi Prezidénsia Repúblika liuhosi Servisu Sosiedade Sivíl no Apoiu Sosiál (SSAS-PR) ba inan-faluk, Modesta Soares, iha aldeia Torilalan, suku Orlalan, postu administrativu Laclubar, munisípiu Manatuto.
Identifikasaun ba kondisaun moris husi benefisiária ne’e, halo direta hosi Xefe Estadu bainhira hala’o viajen ba Laclubar, haree-hetan uma ho medida 3×3 ne’ebé Modesta Soares hela hamutuk ho beioan na’in-rua (2) no animál haki’ak sira.
‘’Iha fulan balun liu ba, ha’u mai iha ne’e (Laklubar), ha’u haree uma ida, ha’u para no tun hodi hasai foto. Ko’alia ho uma na’in, avó ferik ne’e (Modesta) nia oan sira. Hafoin hateke fali, afinál avó ferik hela iha fatin ida aat loos, hela hamutuk ho fahi ho animál seluk, uma laiha,”, PR Horta hateten liuhosi komunikadu imprensa ne’ebé Agência Tatoli asesu hosi mídia Palásiu Prezidensiál, segunda ne’e.
Hosi ne’e, Prezidente Repúblika deside oferese uma ida ho orsamentu $6500, ne’ebé hakfahe ba uma, kioské no harii mos fahi-luhan ho montante hamutuk $500.
‘’Prezidénsia Repúblika halo uma ida ho lalais kedas no entrega ho orsamentu $5000, no aumenta ho $1000 ba kioské (inklui sasán). Halo mós fahi-luhan, atu nune’e avó Modesta kontinua halo nia kriasaun animal,” Xefe Estadu me’e hateten.
Uma ne’ebé Prezidénsia Repúblika harii ho medida 7 x 6, hakfahe ba kuartu rua, sala vizita ida, inklui ho kioské ida ho durasaun konstruisaun kuaze fulan rua no badaen (konstrutór) mai hosi ekipa SSAS-PR.
Xefe suku Orlalan, Carlos José Alves, apresia inisiativa hosi Prezidénsia Repúblika, José Ramos Horta, iha asaun kariedade ne’ebé fó ba nia komunidade vulnerável.
‘’Hanesan autoriedade lokál Orlalan nian, ami agradese no apresia tebes ba Prezidente Repúblika ba jestu kariedade ida ne’e, tanba tulun mós ami-nia komunidade liu-liu ida-ne’ebé mak presiza. Hanesan ita nia inan-feton ne’e, kbi’it la’ék tebes, nia hela iha uma ne’ebé ladi’ak,” nia hateten.
Líder komunitáriu ne’e mós husu atu Prezidénsia Repúblika kontinua nia atividade sosiál ne’e ba inan-faluk kbiit la’ék no família barak ne’ebé presiza tebes tulun, liu-liu halo uma no oferese kióske hodi hatutan moris.
Entretantu, durante mandatu hahu fulan maiu 2022, Prezidénsia Repúblika atuál hala’o atividade apoiu sosiál hamutuk 700-resin ona ba família benefisiáriu sira kuaze 1000-resin iha territóriu nasionál tuir programa prinsipál sira-ne’ebé define ona durante mandatu atuál.
Jornalista : Nelson de Sousa
Editór : Cancio Ximenes
