iklan

EDUKASAUN, HEADLINE

UNPAZ suspende dosente ida husi nia funsaun

UNPAZ suspende dosente ida husi nia funsaun

Reitór UNPAZ, Adolmando Soares Amaral. Imajen Tatoli/Egas Cristovão

DILI, 31 jullu 2023 (TATOLI) – Universidade da Paz (UNPAZ) foti ona desizaun hodi suspende dosente permanente ida husi nia atividade, tanba deskonfia halo abuzu seksuál hasoru estudante feto ida iha sesta-feira liubá.

Reitór UNPAZ, Adolmando Amaral, dehan hahalok ne’e halo husi indivídu ida, maibé públiku jeneraliza ona instituisaun, tanba ne’e universidade labele nega katak dosente refere hanorin iha UNPAZ no universidade husu ona deskulpa ba públiku.

“UNPAZ husu ona deskulpa, maibé hahalok indivídu ida nian regulamenta mós ho sira ne’ebé maka estabelese ona iha universidade nia laran. Tanba ne’e, haree estatutu no kódigu konduta UNPAZ nian ne’e falla boot ida ne’ebé maka dosente ne’e halo ona. Dosente orientadór ho inisiál MG ne’e kontra tebes estatutu UNPAZ nian no kontra mós kódigu konduta dosente nian”, dirijente universidade ne’e dehan iha Ai-mutin, ohin.

Tanba ne’e UNPAZ halo ona suspensaun hasoru manorin ne’e no entrega provizoriamente prosesu hotu ba parte justisa atu prosesa tuir lei ne’ebé vigora iha nasaun ne’e, nune’e bele hetan investigasaun ida profunda.

“UNPAZ halo ona suspensaun hasoru dosente refere, nune’e nia bele bá hasoru prosesu investigasaun atu responsabiliza atu sira ne’ebé nia halo iha sesta foin lalais ne’e. Husi prosesu ne’e mak deteta nia komete duni atu refere no hetan kondenasaun husi Ministériu Públiku, UNPAZ sei demite nia”, Adolmando informa.

Reponsavel ne’e esplika katak suspensaun hasoru dosente ne’e katak sei lahalo atividade tomak iha UNPAZ nia laran, signifika labele mai kontinua sai manorin orientadór ba estudante sira, labele hanorin iha aula no sei la hetan direitu ba saláriu.

Rekorde katak, iha sesta-feira 28 jullu, bainhira dosente refere orienta estudante feto ne’e iha kampus, maibé nia iha planu seluk hodi konvida estudante atu bá orienta iha nia uma. Estudante ne’e mós kumpre no bá hamutuk ho dosente ne’e ho karreta, maibé sira la bá fali uma no ikus mosu fali iha Hera.

Ba kazu tentativa abuzu seksuál ne’e universidade seidauk hatene loloos, tanba sei hein hela prosesu investigasaun husi parte kompetente no karik iha prosesu ne’e naka deteta duni dosente ne’e halo ona asaun imorál hasoru estudante, universidade sei la tolera.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!