COVALIMA, 01 agostu 2023 (TATOLI)–Administradór munisípiu Covalima, Francisco de Andrade, hateten autoridade Covalima promove produtu lokál iha komemorasaun loron FALINTILno loron Konsulta Populár ho kada postu administrativu harii barraka.
“Ha’u husu ba administradór postu administrativu sira, ita prepara ita boot sira prepara harii baraka ida-ida hodi promove produtu lokál kada postu administrativu sira,” Administradór Munisípiu Covalima, Francisco de Andrade, hateten iha enkontru preparasaun iha salaun AMC, Sukaer Laran, tersa ne’e.
Nia dehan, Autoridade Covalima liuhusi Servisu Munisipál Jestaun merkadu no Turizmu, tuir planu, sei loke feira hodi komemora loron FALINTIL, 20 agostu 1975, no loron Konsulta Populár, 30 agostu 1999, iha munisipiu Covalima.
Diretór Servisu Munisipál Jestaun Merkadu no Turizmu, Vitorino do Carmo, autoridade Covalima realiza enkontru ida-ne’e hodi halo preparasaun ba komemorasaun loron FALINTIL no loron konsulta populár.
Iha enkontru ne’e atu deside tema ba komemorasaun loron FALINTIL no loron Konsulta Populár ho sub tema “Hametin unidade, pás no estabilidade”.
Komemorasaun ba loron nasionál rua refere, sei komemora ho hala’o atividade semináriu, kompetisaun kalan kulturál, desportu komunitária, kompetisaun sertame no kompetisaun kulinária produtu lokál no seluk tan.
Tuir planu, feira ne’e sei realiza iha suku Suai Loro, postu administrativu Suai, munisípiu Covalima durante loron 10 nia laran ne’ebé sei hahú hosi 20 fulan-agaostu to’o loron 30 fulan-agostu tinan 2023.
Entretantu, Polísia Nasionál Timor-Leste (PNTL) munisípiu Covalima, garante fó segurasan ba komunidade atu komemora loron Falintil (20 agostu) no loron Konsulta Populár (30 agostu 1999) iha Covalima.
“Atu Komemora loron importante rua ne’e, parte seguransa prontu atu fó seguransa interna no esterna bazeia ba ita-nia konstituisaun. Atu hala’o atividade sira ho di’ak parte seguransa PNTL Covalima prontu atu garante seguransa no husu ita hotu kolabora hamutuk, nune’e labele hamosu konfrontu,” Reprezentante Komandante PNTL Covalima, Asistente Inspetora Cecilia de Jesus Amarál, hateten iha salaun Administrasaun Munisípiu Covalima, stersa ne’e.
Jornalista : Celestina Teles
Editór : Cancio Ximenes
