Eskola Agríkola haat transfere fali ba Ministériu Edukasaun
DILI, 01 agostu 2023 (TATOLI) – Eskola Sekundária Tékniku Vokasionál Agríkola iha Manatuto, Lautém, Bobonaro no Rejiaun Admninistrativa Espesiál Oé-Cusse Ambeno (RAEOA) transfere fila ba Ministériu Edukasaun, informa Sekretáriu Estadu Edukasaun Ensinu Sekundáriu Eskola Téknika, Domingos Lemos.
Governante hatete katak Eskola Tékniku Vokasionál Agríkola haat iha tinan barak tutela ba Ministériu Agrikultura no hetan fundu husi ministériu refere, maibé iha tinan ida ne’e reintegra ba Ministériu Edukasaun, nune’e bele hetan atensaun ida di’ak liután.
“Ita simu ona Eskola Agríkola haat husi Natarbora, Maliana, Lospalos no Oé-Cusse atubele hadi’a fali sira-nian estatutu hodi aselera prosesu dezenvolvimentu, tanba ita konsidera eskola haat ne’e iha poténsia”, Domingos Lemos dehan ba Tatoli, iha Balide.
Ministériu Edukasaun no Agrikultura antes ne’e konkorda ona atu prepara kondisaun di’ak ba Eskola Agríkola ne’e, liuhusi apoia ekipamentu atubele sai referénsia ida iha futuru hodi prepara estudante sira hakat ba nivel ida di’ak atubele tama iha rejiaun aziátika.
Governante ne’e esplika katak transferésnia Eskola Agríkola haat ne’e ba Ministériu Edukasaun, tanba prevee ona iha Programa IX Governu nian, nune’e bele investe ba sira no iha futuru bele kompete iha merkadu traballu.
“Ita laiha problema ho Ministériu Agrikultura tanba ida ne’e programa ne’ebé hatuur ona iha mandatu IX Governu nian. Ne’e duni ita iha liña koordenasaun di’ak hodi dudu progresu ba eskola téknika sira”, katak.
Nune’e mós Diretór Servisu Edukasaun Munisípiu Manatuto, Graciano de Jesus Baptista, realsa katak Eskola Agríkola iha Natarbora nia estatutu ne’e hansan eskola públika, maibé durante ne’e hetan apoiu fundu husi Ministériu Agrikultura.
“Ita akompaña Eskola Agríkola sira iha Manatuto no Natarbora nia dezenvolvimentu di’ak, maibé atu di’ak liu ne’e tenke filafali mai Edukasaun hodi nune’e bele hetan atensaun másima”, afirma.
Jornalista: Tomé Amado
Editora: Maria Auxiliadora
