DILI, 01 agostu 2023 (TATOLI)—Prezidente Parlamentu Nasionál (PPN), Maria Fernanda Lay, tersa ne’e, simu audiénsia ho estrutura Fundasaun Pátria hodi ko’alia kona-ba advokásia aumenta númeru feto iha nível foti desizaun.
“Fundasaun Pátria ninia objetivu mai hasoru Prezidente Parlamentu hato’o programa serbisu balun iha sosiedade nia laran, ne’ebé mak fundasaun hala’o serbisu hamutuk mós ho Grupu Feto Parlamentu Timor-Leste (GMPTL, siglá portugés) no organizasaun hotu-hotu,” Board Fundasaun Pátria, Filomena Barros dos Reis, hateten ba jornalista sira hafoin ramata enkontru iha PN.
Hosi fundasaun, iha pograma lubun ba asuntu feto ne’ebé ko’alia kona-ba feto prontu lidera ne’ebé destina formasaun ida-ne’e oinsá feto sira hamrik forte sai lidér, entaun tenke prepara kedas hosi baze hodi halo advokásia naruk fó formasaun no motivasaun ba oin, sira prontu atu simu kna’ar hodi lidera.
Iha programa kapasitasaun ba maluk feto sira, programa empoderamentu ekonómika iha área rurál no seluk tan.
Nune’e, durante sorumutu ne’e Fundasaun Pátria aproveita kumprimenta no orgulu tebes tambá dahuluk luta advokásia ne’ebé naruk hosi organizasaun feto sira to’o ikus, Timor-Leste iha duni Prezidente Parlamentu Nasionál feto ida.
Board Fundasaun Pátria, Joanita Hornai, hateten iha mandatu ida-ne’e iha inísiu hanesan organizasaun feto sira hamriik iha eleisaun suku ne’e feto hetan na’in lima, eleisaun tuir mai feto 21 no iiha mós feto sira tuur iha Parlamentu Nasionál hanesan kuota fó 30% sae ba 40%, entaun atinje duni kuota ne’ebé durante ne’e organizasaun feto sira halo advokásia.
“Agora daudaun mós hanesan feto sira tuur estrutura foti desizaun, hanoin iha nasionál ita haree to’o agora hira mak sai membru Governu no iha Governu anteriór feto ida sai hanesan Vise Primeiru-Ministru, ne’e hanesan orgullu boot ida,” nia dehan.
Nune’e, ba oin, kontinua halo advokásia haree ba desentralizasaun administrativa ne’ebé IX Governu Konstituisionál tau prioridade ho ida-ne’e, tanba hakarak feto mós sai hanesan Prezidente kamara munsipál.
Jornalista : Nelson de Sousa
Editór : Cancio Ximenes
