PPN-UN Women diskute polítika ba feto-labarik feto iha TL
DILI, 01 agostu 2023 (TATOLI)—Prezidente Parlamentu Nasionál (PPN), Maria Fernanda Lay, tersa ne’e, simu audiénsia Head of Office UN Women iha Timor-Leste, Amy Nishtha Satyam, hodi diskute kooperasaun serbisu liuliu polítika ne’ebé mak responde ba nesesidade feto no labarik feto nian iha Timor-Leste.
“Enkontru ohin loron nian atu mai fó apoiu ba Parlamentu Nasionál no Grupu Feto Parlamentu Timor-Leste (GMPTL, siglá portugés) kona-ba saida mak UN Women bele halo liuliu haree ba polítika no lei sira-ne’ebé responde ba jender no mós oinsá ami bele haree liu ba polítika ne’ebé mak responde ba nesesidade feto no labarik feto nian iha Timor-Leste,” Head of Office UN Women iha Timor-Leste, Amy Nishtha Satyam, hateten ba jornalista sira hafoin ramata enkontru iha PN.
Liuhosi sorumutu ne’e, nia dehan, PPN fó apoiu tebes ba diskusaun refere no PPN haree liu ba oinsá UN Women bele haree ba prioridade ne’ebé mak sira mós identifika hanesan empoderamentu ekonómiku feto, apoiu iha eleisaun suku oinsá hetan liután feto sira iha pozisaun kaer kna’ar no iha lideransa ninian.
“PPN mós haree mai ami bele prepara mós dadus ne’ebé di’ak no analiza ho estatutu feto nian iha Timor-Leste,” nia hateten.
Enenkontru ida-ne’e hanesan enkontru dahuluk no tuir mai sei halo sorumutu regulár, no bibán ne’e ko’alia mós oinsá hasa’e kapasidade nune’e UN Women sei fó apoiu téniku ninian ba iha PN no ba iha GMPTL .
Jornalista : Nelson de Sousa
Editór : Cancio Ximenes
