Tribunál hahú férias judisiál, julgamentu ba de’it kazu urjente

DILI, 01 agostu 2023 (TATOLI)–Prezidente Tribunál Rekursu, Deolindo dos Santos, relata ba Prezidente Repúblika, José Ramos Horta, katak hahú fulan-agostu ne’e Tribunál hahú férias judisiál.

“Fó hatene ba Prezidente Repúblika katak hahú loron 01 agostu to’o 15 setembru 2023, Tribunál férias judisiál, katak juís no ofisiál justisa sei feriadu, tanba kada juís iha direitu feriadu loron 25,  Ida-ne’e sei taka julgamentu ba prosesu sira ne’ebé normál, enkuantu prosesu ne’ebé sei la’o sira ba kazu urjente,” Deolindo dos Santos, hateten hafoin reuniaun ho Xefe Estadu, iha Palásiu Prezidensiál, Bairru Pité, tersa ne’e.

Notísia relevante : Férias judisiál, Tribunál Rekursu sei funsiona parsialmente

Nia dehan, prosesu sira ne’ebé konsidera urjente no bele hala’o julgamentu iha tempu feriadu judisiária ne’e ba prosesu sira hanesan prezu, habeas korpus, prodénsia kautelar sira.

“Ida-ne’e juís sira sei hala’o servisu nafatin ho forma turnu maibé julgamentu baibain la la’o,” nia akresenta.

Jornalista     : Antónia Gusmão

Editora          : Julia Chatarina