DILI, 02 agostu 2023 (TATOLI)–Governu liuhosi Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, rekoñese konstrusaun Monumentu 12 Novembru la’o tarde tebes no karik sei la finaliza iha 2023.
Notísia Relevante: Konstrusaun Monumentu 12 Novembru tarde tanba fallansu tékniku
“Atu dehan konstrusaun memoriál 12 Novembru Santa Cruz ne’e, ha’u haree la’o tarde tebe-tebes no konstrusaun ne’e asina kontratu iha tinan 2021 ho Ministru sesant. Ohin, ha’u mai asume Ministru iha ne’e, obra fíziku ne’ebé loron rua-tolu liubá, ha’u haree foin mak atinje 17%, lahatene nia obstákulu saida,” Oan Soru hateten ba Agência Tatoli iha nia kna’ar fatin Caicoli, tersa ne’e.
Nia hatutan, nia parte haruka ona nia tékniku ba observa konstrusaun refere no hein rezultadu hafoin mak bele fó sai tanbasá mak foin atinje 17%.
“Ho obstákulu ida-ne’e, ha’u haruka tékniku ba no ha’u fó ona hanoin ba sira, maibé ita hamutuk atu rezolve no hodi fó solusaun,” nia hateten.
Husu kona-ba 12 Novembru 2023 ne’e bele inaugural monument 12 Novembru, nia hatán, konstrusaun haree foin 17%, no ohin tama ona ba fulan-agostu, oinsá mak bele hanoin to’o inagurasaun.
“Kuandu to’o agora mak 70% mak ha’u bele dehan Novembru inaugural, maibé ha’u haree foin 17% ne’e, prosesu konstrusaun ne’e komplikadu uitoan iha tinan kotuk liuba ne’e,” nia dehan.
Orsamentu ne’ebé aloka ba konstrusaun Memoriál Santa Cruz ka Monumentu 12 Novembru ne’e hamutuk $1.385.389.88.
Konstrusaun refere hahú konstrui iha 22 setembru 2021 to’o 22 setembru 2022 maibé seidauk konklui, depoimentu Governu liuhosi Ministériu Asuntu Kombatente Libertasaun Nasionál (MAKLN) prolonga to’o tinan 2023.
Antes ne’e, iha 13 juñu 2023, Komisaun Antí Korrupsaun (CAC) fó sai rezultadu inspeksaun ba projetu ida-ne’e, CAC identifika katak tuir kontratu projetu ida-ne’e hahú implementa iha loron 22 setembru 2021 to’o 22 setembru 2022 no halo ona estensaun kontratu ba fulan-neen, maibé projetu fiziku foin atinje to’o pursentu 17,65 (17,65%). CAC mós identifika iha lakuna balun mak akontese relasiona ho dokumentu sira dezeñu nian.
Jornalista : Osória Marques
Editór : Cancio Ximenes
