Grupu komunitária 11 hahú loke bankária ezekuta projetu PKRE iha Baucau
BAUCAU, 02 agustu 2023 (TATOLI) – Grupu komunitária hamutuk 11 hahú loke bankária hodi ezekuta projeiru Programa Konstrusaun no Reabilitasaun Eskolár (PKRE) iha munisípiu Baucau.
Diretór Serbisu Munisipál Edukasaun Baucau, Augosto Ornai Ximenes, esplika, grupu hirak-ne’e antes ne’e finaliza ona formasaun kona-ba matadalan implementasaun projetu PKRE ba faze daruak tinan-2023 hosi Diresaun Nasionál Parke Eskolár Ministériu Edukasaun iha Baucau.
“Formasaun finaliza ona agora iha faze loke bankária, maibe tanba iha prosesu tranzisaun governu entaun ita sei hein orden hosi Ministériu Edukasaun,” Diretór Serbisu Munisipál Edukasaun Baucau hateten iha Vila Nova, kuarta ne’e.
Serbisu Munisipál Edukasaun Baucau kontinua hein kona-ba prosesu transferensia orsamentu ba kada bankária nune’e grupu komunitária bele hahú ezekuta projetu refere iha Baucau.
Munisípiu Baucau iha tinan-2023 sei implementa projetu hamutuk 11 iha ensinu eskolár kompostu pre-eskolár hamutuk 5, ensinu báziku hamutuk eskola tolu no ensinu sekundária jerál hamutuk tolu.
Eskola hira refere hanesan pre-eskolár Haudere, pre-eskolár Lebenei postu Baguia, pre-eskolár Abulir, EBF primeiru no segundu siklu, EBF Sarabata, Eskola Sekundária Laisorulai postu Quelicai.
Edukasaun pre-eskolár Bercoli, EBF Uaimanuboe postu Venilale, pre-eskolár Buibau, Eskola Sekundária Aubaca no Eskola Sekundária númeru 1 postu Baucau vila.
“Tarde tanba aprovasaun matadalan hahú tarde nune’e formasaun iha fulan-juñu no jullu loke bankaria maibe governu sei fó orientasaun,” Augosto Ximenes akresenta.
Hosi projeitu 11 refere sei utiliza orsamentu hamutuk milaun $1.2 no projetu 10 mak konstrusaun foun, enkuantu Eskola Ensinu Sekundária númeru 1 Baucau vila mak reabilitasaun liuliu kondisaun kakuluk no sala profesór.
Jornalista : Natalino Belo
Editór : Evaristo Soares Martins
