Komisaun F bolu urjente MS solusiona pasaporte pasiente 50 ba rai-li’ur
DILI, 02 agostu 2023 (TATOLI)—Komisaun F trata asuntu Saúde, Seguransa Sosiál no Igualidade Jéneru iha Parlamentu Nasional (PN), kuarta ne’e, halo audiénsia urjente ho Ministéiru Saúde (MS) hodi solusiona problema pasaporte ba pasiente hamutuk na’in-50 hodi transfere ba rai-li’ur halo tratamentu saúde.
“Objetivu ohin, ami audiénsia ho Ministra Saúde ho nia Vise na’in-rua ko’alia problema pasaporte ba pasiente atu transfere ba rai-li’ur, ne’ebé iha pasiente 40 inklui ho pasiente veteranu na’in 10, hamutuk pasiente 50,” Prezidente Komisaun F, Deputada Maria Gorumalli Barreto, hateten ba jornalista sira iha uma fukun PN.
Preokupasaun ne’e komisaun simu hosi pasiente no família pasiente sira presiza solusiona, tanba pasiente sira-ne’e labele hala’o tratamentu iha rai-laran, liuliu sira-ne’ebé mak ho moras kankru, kardiolójia, fase raan no moras rins.
Pasiente sira ninia dokumentu pasaporte eletróniku ne’ebé mak sei bele prosesu hela sai problema boot ba pasiente sira-ne’ebé atu haruka ba rai-li’ur, pasiente no família pasiente balun laiha pasaporte no balun laiha dokumentu hanesan billete identidade, kartaun eleitorál ho sertidaun RDTL, nune’e presiza prepara ninia dokumentu hotu bainhira atu bele
hetan pasaporte.
Ministra Saúde presiza halo liña koordenasaun ho Ministéiru Negósiu Estranjeiru no Kooperasaun (MNEK) no Minitéiru Justisa (MJ), hodi buka solusaun.
Nia hateten, Ministra Saúde, Élia A.A. dos Reis Amaral, labele prosesa buat sira-ne’e tanba problema pasaporte ne’ebé agora daudaun Timor-Leste enfrenta, maibé sei haree didi’ak junta médiku ne’ebé iha.
“Ministra Saúde hatán depois nia parte sei haree didi’ak fali karta ne’ebé mak junta médiku hosi HNGV haruka ba Ministéiru Saúde, atu bele prosesu hodi hein pasaporte ne’ebé agora sei prosesa hela iha rai-li’ur,” nia dehan.
Ministra Saúde (MS), Elia Amaral, hateten horisehik MS simu karta hosi komisaun F hodi marka audiénsia, relasiona ba pasiente ne’ebé atu halo tranferensia ba rai-li’ur, nune’e audiénsia ne’e ko’alia liu ba transferénsia pasiente ba rai-li’ur ne’ebé komisaun simu keixa hosi pasiente no família rasik.
“Karta ne’ebé hosi HNGV haruka ba Ministéiru Saúde, karta ne’e tama duni iha sesta-feira, no agora iha prosesa nia laran ona,” nia hateten.
Jornalista : Nelson de Sousa
Editór : Cancio Ximenes
