Saúde Covalima rejista inan isin-rua vizita dahuluk fasilidade saúde hamutuk 961
COVALIMA, 02 agostu 2023 (TATOLI)—Diretora Servisu Saúde Munisípiu Covalima, Maria de Fátima Moniz, hateten Servisu Saúde Munisípiu Covalima rejista inan isin-rua vizita dahuluk postu no senru saúde hamutuk na’in-961 ne’ebé atinje ona 95%.
“Ita-nia álvu inan isin-rua 2019 Ita fahe ba semestrál katak inan isin-rua ne’e ita kobre semestrál durante fulan neen iha vizita dahuluk tuir álvu 1010, maibé inan isin-rua 961 mak vizita ona inan isin-rua hosi álvu 961 ho nia atinje ona 95%. Vizita dahaat hosi alvu ne’ebé iha ba semestrál 1010, ita hetan 339 ne’ebé atinje 34%,” Maria de Fátima Moniz hateten ba Agência Tatoli, iha nia kna’ar fatin, Camanasa, kuarta ne’e.
Bazeia ba relatóriu ne’ebé hahú hosi fulan-janeiru to’o fulan-juñu númeru inan isin-rua ne’ebé vizita ba sentru saúde no postu saúde sira, aumenta másimu tanba vizita dahuluk ne’ebé atinje 90%.
“Tanba inan isin-rua mínimu vizita da ualu (8), xave indikadór mínimu dahaat tuir unidade isin-rua, entaun indikadór ne’ebé ami tau iha relatóriu indikadór dahuluk vizita dala-ida aumenta másimu inan isin-rua hotu-hotu vizita sentru saúde hitu 95%” nia esplika
Tuir observasaun, implementa Programa bolsa da Mãe Jerasuan Foun fó nia impaktu pozitivu, tanba inan isin-rua sira entuziasmu hala’o konstulta iha sentru saúde no postu saúde sira iha ida-idak nia fatin.
Antes ne’e, atinjimentu inan isin-rua vizita ba sentru saúde ba dahaat ho númeru ne’ebé kiik, ho razaun tanba inan isin-rua ne’ebé mai asesu iha fasilidade saúde tarde impaktu vizita dahaat nian.
“Ita haree hosi estandarizasaun atu hetan vizita dahaat kompletu, inan isin-rua tenke mai sedu. Tanba, durante fulan tolu vizita dala ida bainhira inan isin-rua mai sentru saúde idade semana 13, nia labele hetan vizita ba dahaa. Maske mai no ba mós, vizita rutina kontinua halo atendimentu, nia la prense kritéria,” nia dehan.
Razaun la prienxe kritéria tanba hakarak inan isin-rua hetan atendimentu sedu T7 to’o hetan informasaun klaru nune’e labarik tenke ho kualidade.
Ho nune’e, MS fo xave indikadór inan isin-rua vizita sentru saúde no postu saúde to’o hotu, asesu informasaun klaru no bebê hetan imunizasaun hahú inisiu.
“Ita halo esforsu makaas liuhosi promosaun molok presoál saúde halo atendimentu halo advokasia ho autoridade lokál, katak inan isin-rua laós hósi ami parte saúde de’it, maibé autoridade lokál mós iha dever oinsá bele fó hanoin ba inan isin-rua sira-ne’ebé hela iha suku to’o aldeia, mobiliza inan isin-rua halo atendimentu,” nia hateten.
Iha Govalima, Governu liuhosi Ministériu Saúde estabelese ona sentru saúde hitu hanesan iha postu administrativu, Suai, Zumalai, Maucatar, Fatululik, Fatumea, Fohorem no Tilomar no postu saúde hamutuk 24.
Jornalista : Celestina Teles
Editór : Cancio Ximenes
