DILI, 03 agostu 2023 (TATOLI) – Ministra Edukasaun, Dulce de Jesus, no Enkarregada Negósiu Embaixada Austrália, Caitlin Wilson, aborda kooperasaun iha setór edukativu, liuliu Programa Apoiu Lideransa liuhusi Mentoria no Aprendizajen (ALMA).
Dulce de Jesus lembra katak ALMA ne’e programa ne’ebé hahú implementa dezde 2016 no atividade ne’e di’ak tanba bele ajuda implementasaun kurríkulu, halo jestaun ba sala aula nomós formasaun ba dirijente eskola nian hanesan diretór sira, adjuntu no Gabinete Apoiu Tékniku sira.
Tuir dadus 2020 husi Ministériu Edukasaun, Juventude no Desportu anteriór, Programa ALMA implementa ona iha munisípiu 10 no kobre ona eskola 552 no benefisia ona líder eskola hamutuk na’in-830 no alunu 78.686.
Programa ne’e rasik iha komponente sira mak hanesan fakulta Formasaun ba Líder Edukasionál, Fasilita Grupu Traballu ba Profesór (GTP), Promove Partisipasaun Manorin Feto atu envolve-aan iha atividade eskolár no Promove Edukasaun Inkluziva. ALMA ne’e uza mós instrumentu teknolojia edukasionál atu fasilita dirijente eskola sira.
Programa ALMA ne’e liuhusi parseria entre Governu Timor-Leste no Austrália ho nia objetivu mak atu hadi’a kualidade edukasaun, liuhusi hasa’e dirijente eskola no manorin sira-nian abilidade no kria ambiente aprendizajen ida inkluzivu hodi asegura katak labarik hotu bele asesu ba edukasaun ne’ebé kualidade ne’ebé deskreve ona iha Planu Estratéjiku Nasionál ba Edukasaun 2011-2030.
Aleinde diskute Programa ALMA, parte rua ne’e mós ko’alia sobre Programa Edukasaun Inkluziva, Edukasaun Multi Língua no possibilidade ministériu sei identifika tan programa balun atubele hetan apoiu husi Governu Austrália.
Governante salienta katak, iha tempu badak, sei realiza enkontru ho ajénsia sira hodi haree fila-fali karik presiza atu hadi’a buat ruma hodi bele hasa’e kualidade edukasaun iha Timor-Leste.
“Ministra Edukasaun sei hamutuk ho Enkarregada Negósiu Embaixada Austrália vizita eskola sira hodi haree diretamente programa ne’ebé mak la’o ona no iha posibilidade sei halo estensaun ba eskola sira seluk”, refere komunikadu husi Ministériu Edukasaun ne’ebé Tatoli asesu.
TATOLI
