DILI, 03 agostu 2023 (TATOLI)—Prezidente Repúblika (PR), José Ramos Horta, kinta ne’e, simu audiénsia ho Embaixadora Cuba iha Timor-Leste, Grisel Alina Aldama Innis, hodi ko’alia kona-ba kooperasaun bilaterál entre rai rua iha área saúde nian.
“Objetivu ba vizita ohin, realiza revizaun ba kooperasaun bilaterál entre nasaun rua ne’e ba Prezidente, bazikamente ko’alia kona-ba kooperasaun liuliu iha área saúde nian no ba dosente sira-ne’ebé agora daudaun hanorin iha Universidade Nasionál Timor-Leste (UNTL) nian ba iha ensinu médiku nian no mós ba estudante sira-ne’ebé daudaun hala’o sira-nia estudu iha Cuba,” Embaixadora ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Cuba kontinua apoiu dezenvolvimentu Timor-Leste liuliu iha área rekursu umanu iha área saúde.
Daudaun ne’e, estudante sira-ne’ebé hala’o estudu iha Cuba hamutuk na’in-38 no estudante sira-ne’ebé daudaun hala’o estudu iha UNTL ne’ebé hamutuk 1000.
Iha sorumutu ne’e, ko’alia mós área kooperasaun ne’ebé durante iha área desportu no kultura ho kooperativa ninian.
Bibán ne’e, Embaixadóra Cuba ne’e entrega programa prinsipál manuál ba iha Prezidente Repúblika ba iha konferénsia nivel altu ba grupu GZ77+ ne’ebé sei hala’o iha Cuba iha loron 15-16 setembru ne’e.
Jornalista : Nelson de Sousa
Editór : Cancio Ximenes
