Profesór reklamante husu PN-Governu solusiona sira-nia preokupasaun
DILI, 03 agostu 2023 (TATOLI)—Portavós Profesór Reklamante, Bernardo Augosto Fernandes, husu Parlamentu Nasionál (PN) iha lejislatura daneen atu hamutuk ho IX Governu konstitusionál atu buka solusiona sira-nia preokupasaun.
Notísia Relevante: Edukasaun analiza ona dokumentu profesór reklamante 500 no publika iha tempu badak
“Ami mai hosi profesór reklamante munisípiu 13 nia reprezenta mai iha ne’e, hato’o karta pedidu ba Parlamentu Nasionál liuhosi komisaun G (trata asuntu Edukasaun) no Prezidente Parlamentu Nasionál hodi hala’o audiénsia ho sira, tanba ami profesór reklamante ne’e hosi Governu anteriór liuliu Ministériu Edukasaun (ME) seidauk solusiona ami-nia problema, ami husu Parlamentu Nasionál iha lejislatura ne’e ho Governu atu solusiona,” Portavós ne’e hateten ba jornalista sira hafoin entrega karta pedidu audiénsia ba PN, kinta ne’e.
Durante prosesu anúnsiu naran iha jornál repúblika iha 10 fevereiru 2023 ne’e la justu, iha diskirimasau no la loos, ba prosesu ne’e iha totál profesór reklamante iha territóriu hamutuk 3500 no profesór sira-ne’ebé foin lalais pasa teste hamutuk 1499.
“Tanba hamosu familiarizmu, partidarizmu, nota mós profesór mate klamar, sira foin serbi no balun seidauk serbi. Maibé, ami sira-ne’e serbi loloos duni, ami iha evidénsia kompletu ne’ebé mak iha rekrutamentu profesór voluntáriu ba kontratadu, ami iha evidénsia sira-ne’ebé iha. Maibé durante anúnsiu naran no publika iha Jornál Repúblika, ami komesa ezije no lamenta ona maibé nunka hetan nia rezulatdu,” nia hateten.
Profesor reklamante sira-ne’e mós dedika sira-nia aan no kontribuisaun iha dezenvolvimentu nasaun liuhosi setór edukasaun durante tinan barak ona balun tinan tolu to’o ba tinan 10.
Antes ne’e mós ekipa profesór reklamante sira audiénsia ona ho Prezidente Parlamentu Nasionál sesante, ho Komisaun G depois mós hosi parte munisípiu Baucau hamutuk ho Prezidente Komisaun G forma komisaun konjunta ida atu halo re-verifikasaun, no halo konferénsia imprensa dala barak maibé laiha resposta ba ezijénsia sira.
Haafoin ne’e, liu tiha ,haruka fali halo karta reklamasaun la konsidera to’o mandatu Governu anteriór ramata.
Nune’e, ho pedidu audiénsia ne’e fiar katak PN sei tau atensaun makaas hodi ko’alia ho IX Governu Konstitusionál bele solusiona preokupasaun ne’e.
“Ami fiar katak, tenke responde, se la responde Governu ida-ne’ebé mak responde fila-fali, se la’ós ami sidadaun Timor tanba ami mós sidadaun Timor,” nia dehan.
Notísia Relevante: Submisaun dadus tarde, difikulta estatutu profesór reklamante sira
Jornalista : Nelson de Sousa
Editór : Cancio Ximenes
