Traballadór Guarda Lorosa’e hasoru komisaun E kontinua ezije sira-nia direitu
DILI, 03 agostu 2023 (TATOLI)—Portavós Traballadór Guarda Lorosa’e, Nuno Soares, hamutuk ho ekipa, kinta ne’e, hala’o audiénsia ho komisaun E trata asuntu Infraestrutura iha Parlamentu Nasionál (PN), hodi kontinua husu PN iha lejislatura daneen ne’e atu hamutuk ho IX Governu Konstituisionál hodi solusiona sira-nia direitu.
“Ohin, ami hasoru halo audénsia ho Prezidente komisaun E atu husu tuir kona-ba ami-nia direitu, tanba iha tinan haat nia laran tiha ona, hahu hosi tinan 2019 hetan tiha ona rezolusaun hosi Parlamentu, despaixu hosi Primeiru-Ministru, relatóriu hosi EDTL maibé to’o agora seidauk halo pagamentu. Tanba ne’e, ami mai husu oinsá ami-nia direitu,” Portavós ne’e hateten ba jornalista sira hafoin ramata audiénsia ho Komisaun E iha PN.
Nia dehan, totál traballadór hamutuk 390 ne’ebé seidauk hetan pagamentu to’o agora, no traballadór hirak ne’e fó seguransa iha estasaun oli pezadu ninia ne’ebé kada traballadór ho saláriu kada fulan $120.
Nia rekomenda ba IX Governu Konstitusionál tau atensaun hodi solusiona preokupasaun ne’ebé tinan barak ona sira hasoru.
Prezidente Komisaun E, Marcos Xavier, hateten papél komisaun nian mak informa no rekomenda ba Governu no problema ida-ne’e kle’ur ona, dezde VIII Governu Konstitusionál no momentu ne’eba komisaun E rasik mós simu ona keixa hosi traballadór sira-ne’e.
“Problema ne’e haruka ona ba Ministéiru Obra Públika (MOP) atu rezolve, maibé to’o mandatu Governu hotu depois seidauk rezolve, foin sira hatama fali karta mai komisaun no Ministru Obra Públika ho Sekretáriu Estadu Eletrisidade,” nia dehan.
Deputadu hosi bankada Governu ne’e hateten, IX Governu iha vontade atu rezolve maibé hein lai Orsamentu Retifikativu (OR) no komisaun rasik sei hato’o ba Ministru Obra Públika haree preokupasaun ne’e sériu uitoan.
Problema ne’e, uluk, Guarda Lorosa’e sira mak halo seguransa ba iha sentru oli pezadu iha territóriu, entaun VIII Governu nia tempu halo fali konkursu ba kompañia seguransa sira, entaun momentu ne’eba Guarda Lorosa’e la tuir konkursu entaun mosu fali guarda foun Guardamor sira mak vensedór, nune’e iha fatin oli pezadu ne’e Guarda Lorosa’e hotu.
“Ho ida-ne’e mak kompañia ida manán, kompañia halo fali rekrutamentu ba ema seluk, iha balun mak sira inklui Guarda Lorosa’e balun tama. Maibé balun lae, na’in-390 la inklui, entaun prosesu ne’e mais sira mantein serbisu iha fatin sira-ne’ebé destaka ba, entaun momentu ne’eba sira lakohi sai iha fatin ne’e,” nia dehan.
Nia hateten, entaun Governu anteriór iha inisiativa sira hatama tiha keixa mai to’o iha PN no PN rekomenda ba Governu atu rezolve tiha, maibé la konsege to’o mandatu Governu ramata.
“Agora, todan boot ida ba IX Governu oinsá bele rezolve ita-nia sidadaun na’in hirak ne’e,” nia dehan.
Jornalista : Nelson de Sousa
Editór : Cancio Ximenes
