Top

Aban PPN dezloka ba Indonézia partisipa forum AIPA

Prezidente Parlamentu Nasionál (PPN), Maria Fernanda Lay. Imajen Tatoli/António Daciparu.

DILI, 04 agostu 2023 (TATOLI)—Prezidente Parlamentu Nasionál (PPN), Maria Fernanda Lay, sábadu (05 agostu 2023) aban, sei dezloka ba Jakarta-Indonézia hodi partisipa forum asembleia jerál ba dala-44 ASEAN Inter-Parlamentary Assembley (AIPA) ne’ebe sei realiza iha segunda-kinta (07-10 agostu 2023) semana oin.

“Ne’e ajenda ne’ebé iha tiha ona semana preparativu halo tiha ona ba AIPA,” Prezidente Parlamentu Nasionál ne’e hateten ba jornalista sira iha uma fukun PN, sesta ne’e

Ajenda prinsipál ne’ebé sei ko’alia iha sorumutu ASEAN Inter-Parlamentary Assembley (AIPA) ko’alia mós kona-ba prosesu Timor-Leste nia adezaun, nune’e prezensa PN nian iha sorumutu ne’e hanesan observadór sei hato’o mós intervensaun, inklui ajenda importante seluk sei ko’alia iha forum ne’e.

“Ita atu adere ba ASEAN, ida-ne’e ita hanesan observadór. Ne’ebé, ami ba hanesan observadór, ami sei iha intervensaun no konserteza sei iha diálogu, sira sei husu ita preparadu ka lae,” nia hateten.

ASEAN Inter-Parlamentary Assembley (AIPA) uluk hanaran ASEAN Inter-Parlamentary Organization (AIPO), prosesu hahú dezenvolve aan hahú hosi intensaun membru Parlamentu nasaun sira iha ASEAN, ne’ebé esforsu hodi dezenvolve opiniaun hamutuk hodi hametin kooperasaun.

Inisiativa harii AIPA iha tinan 1970 liubá, ne’ebé ajuda hosi membru Estadu ASEAN tomak, Parlamentu Repúblika Indonézia, aprezenta ideia hodi harii organizasaun ne’ebé kompostu hosi membru Parlamentu sira hosi ASEAN tomak hanesan Indonézia, Malázia, Filipina, Singapura no Tailándia.

Ideia ne’e konkorda hosi Parlamentu Malázia no Singapura, tanba ne’e nasaun vizita Indonézia iha tinan 1973, iha 1974 Parlamentu Indonézia haruka delegasaun ba Parlamentu Tailándia no Filipina hodi buka apoiu, nune’e apoiu malu iha forum Parlamentu ASEAN refere.

AIPO ofisiálmente sai hanesan organizasaun entre Parlamentu iha nasaun ASEAN nian liuhosi deklarasaun Statues of AIPO, iha loron 2 setembru 1977, reuniaun dahuluk AIPO nian hala’o iha 26-28 setembru 1978 iha Singapura.

Iha reuniaun ba dala-27 AIPO nian iha 2006, iha Cebu City, Filipina, estatutu AIPO ofisiálmente halo andamentu ba estatutu AIPA.

Oras ne’e, AIPA iha membru Parlamentu 10 hosi nasaun sira ASEAN hanesan Kambodia, Indonézia, Laos, Malázia, Filipina, Singapura, Tailándia, Vietname, Brunei Darussalan, no Myanmar.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!