DILI, 04 agostu 2023 (TATOLI)—Ministériu Solidariedade Sosiál no Inkluzaun (MSSI) ho Fundu Nasaun Unida ba Infánsia (UNICEF, sigla portugés) kontinua hametin kooperasaun serbisu iha área prioridade implementasaun lei protesaun ba labarik, polítika bem-estár sosiál ba labarik no formasaun profisionál ba funsionáriu sira.
Notísia Relevante: Sensibilizasaun projetu-lei protesaun ba labarik sei hein Governu foun
“UNICEF hanesan organizaun ida-ne’ebé sai ona Timor-Leste nia parseria dezde kedas hosi tinan 1999 to’o ohin loron, no liuliu ligadu ho asuntu seguransa sosiál no inkluzaun nian,” Ministra Solidariedade Sosiál no Inkluzaun (MSSI). Verónica das Dores, hateten liuhosi komunikadu hafoin hala’o enkontru ho Reprezentante UNICEF, Bilal Durrani, ne’ebé Agencia tatoli asesu, sesta ne’e.
Governante ne’e hatutan, formasaun ba kapasitasaun rekursu umanu MSSI nian ligadu ho protesaun sosiál ba larabik sira ne’ebé enfrenta risku violénsia no tetu hamutuk mós kona-ba lei protesaun ba labarik sira iha Timor-Leste ne’ebé presiza halo diskusaun antes lori ba Konsellu Ministru, hodi bele hetan aprovasaun ba ninia implemetasaun iha futuru.
“Daudaun ne’e UNICEF estabelese ona Sentru Solusaun Bazeia ba Komunidade ka Con unity Based Solutions, ho programa prinsipál tolu hanesan hasoru família ka meeting family, empoderamentu foinsa’e no sentru amigavél. Aleinde ne’e, UNICEF mós estabelese ona Sentru Komunidade hamutuk 22 iha Timor-Leste no membru sira maiória. Hosi Sentru Komunidade ne’e husu ba MSSI atu kontinua fó apoiu ba sentru hirak-ne’e, ligadu ho programa protesaun sosiál ne’ebé mak MSSI serbisu hamutuk ho Governu Austrália implementa hela dadaun,” nia dehan.
Reprezentante UNICEF, Bilal Durrani, husu ministra atu lori no defende ezbosu estratéjia no politika protesaun ba labarik iha reuniaun Konsellu Ministru nian, tanba lei ne’e importante tebes ba servisu protesaun labarik Timor-Leste iha future, atu hakle’an liután asuntu estratéjiku ba ezbosu refere parte rua deside hala’o fali sorumutu iha tempu tuir mai hodi bele halo aprezentasaun.
Entretantu ligadu ba asuntu formasaun profisionál nian, UNICEF haruka ona funsionáriu na’in-ualu (8) hosi MSSI hodi ba tuir formasaun profisionál durante fulan ida iha Austrália.
Formasaun iha rai-laran mós, UNICEF hal’ao iha loron 10 Fevereiru 2023 no entrega ona sertifikadu ba funsionáriu MSSI na’in-ualu (8) ne’ebé konklui formasaun iha área Formadór Formasaun Profísionál Serbisu Nain Sosial (SNS), no formadór ba formasaun ne’e hosi International Student Admission Teste (ISAT) Austrália.
“Ami-nia prioridade mak atu kontinua serbisu hamutuk ho MSSI hodi hamutuk fó protesaun ba labarik sira labele sai vítima ba abuzu. Ami hakarak kontinua serbisu hamutuk ho MSSI hodi hasa’e kualidade rekursu umanu ne’ebé treinadu no kualifikadu hodi fó apoiu ba programa no politika protesaun ba labarik,” nia dehan.
Notísia Relevante: PN aprova projetu-lei protesaun ba labarik iha finál globál
Jornalista : Osória Marques
Editór : Cancio Ximenes
