COVALIMA, 04 agostu 2023 (TATOLI)—Diretór Servisu Munisipál Agrikultura Covalima, Reinaldo Coli, hateten natar ektare 300-resin iha suku Suai Loro ameasadu sei abandona tanba agrikultura halai natar no hasa’e produsaun uza ekipamentu manuál.
“Área potensiál natar iha Suai Loro hamutuk ektare 700 ne’ebé daduaun ne’e agrikultura konsege kultivasaun hare ektare 334 hodi hasa’e produsaun sei uza manuál, maibé ita-nia natar ektare 300-resin sei abandona,” Reinaldo Coli hateten ba Agência Tatoli iha salaun AMC, Sukaer Laran, sesta ne’e.
Kona-ba kestaun ne’e, nia parte relata ona ba Ministru Agrikultura no Peska (MAP) no se bele haree irrigasaun iha Suai Loro, tanba Ministru Agrikultura no Peska nia tau ona vistu no sei fó prioridade iha tinan 2025.
Atu garante seguransa aí-han iha família mak haree nune’e presiza konstrui irrigasaun, daudaun ne’e sidadaun lakohi han batar loro-loron maibé loro-loron han etu tanba ne’e presiza hasa’e produsaun hare.
Munisípiu Covalima área potensiál ba agrikultura hanesan hare, batar, fore-mungu, koto, fore-keli, pateka, ortikultur no seluk tan.
Jornalista : Celestina Teles
Editór : Cancio Ximenes
