DILI, 04 agostu 2023 (TATOLI)—Prezidente Parlamentu Nasionál, Maria Fernanda Lay, hateten Parlamentu Nasionál (PN) sei kria komisaun ida hodi apoiu prosesu Timor-Leste nia adezaun ba ASEAN.
“Sei halo hodi halo akompañamentu kona-ba asuntu sira-ne’e,” Prezidente PN ne’e hateten ba Agência Tatoli iha PN, sesta ne’e.
Tuir Rejimentu Parlamentu Nasionál (RPN) iha artigu 37 (Komisaun eventual sira-nia kompeténsia) kompete ba komisaun eventuál atu apresia asuntu ne’ebé sai razaun hodi konstitui komisaun ne’e, no aprezenta relatóriu no paresér respetivu iha prazu ne’ebé Parlamentu fixa.
Antes ne’e, Prezidente Repúblika (PR), José Ramos Horta, rekomanda ba Parlamentu Nasionál iha lejislatura daneen atu kria komisaun parlamentár ida kona-ba hala’ok ASEAN nian, hodi halo la’o makaas prosesu lejislativu ne’ebé presiza liuliu ba ratifikasaun ba tratadu hirak hotu.
“Rekomenda ba Parlamentu Nasionál atu aprova autorizasaun lejislativa hodi haforsa kbiit jurídiku ba Governu hodi realiza hala’ok lejislativu ne’ebé presiza, hanesan elimina dupla tributasaun, protesaun ba investimentu, komisaun ba arbitrajen kona-ba rezolusaun ne’ebé justu,” HOrta hateten.
Jornalista : Nelson de Sousa
Editór : Cancio Ximenes
