Fundasaun Prémiu Prinseza Maha Chakri vizita Eskola EBC 01 Baucau
BAUCAU, 05 agostu 2023 (TATOLI) —Fundasaun Prémiu Prinseza Maha Chakri (PMCAF, sigla inglés) hosi Tailándia, sábadu ne’e, halo vizita ba Eskola Ensinu Báziku Sentrál (EBC, sigla portugés) 01 Tirilolo, Baucau hodi haree kondisaun no atividade premiadu tinan 2021, Vicente Marçal da Silva.
“Fundasaun Maha Chakri kontente no agradese tanba bele vizita hafoin Timor-Leste hola parte iha prémiu ne’e,” Xefe delegasaun PMCAF Tailándia, Krissanapong Kirtikara, hateten iha resintu eskola, Vila Antiga.
PMCAF liuhosi Embaixadór Tailándia iha Timor-Leste kompromete atu kontinua serbisu hamutuk ho Estadu Timor-Leste hodi apoia Ministériu Edukasaun, liu-liu eskola sira ne’ebé simu prémiu Maha Chakri.
Notísia relevante : Profesór Vicente sai vensedór prémiu Maha Chakri hosi Tailándia
Projetu ne’ebé fundasaun atu apoia mak eleva kualidade ensinu iha Timor-Leste liuhosi aprosimasaun metodolojia sentradu iha Ministériu Edukasaun no projetu seluk mak liuhosi manan-na’in hosi nasaun Malaysia ho intensaun atu halo ligasaun ho profesór manán-na’in sira iha Asosiasaun País Sudeste Aziátiku (ASEAN, sigla inglés) hanesan koneksaun no komunikasaun entre profesór sira atu ajuda tuir nesesidade.
“Sira bele halo komunikasaun di’ak entre profesór sira hodi dezenvolve setór edukasaun iha Timor-Leste,” Krissanapong Kirtikara akresenta.
Iha biban hanesan, Profesór Vicente Marçal da Silva, nu’udar manán-na’in prémiu, sente urgullu ba vizita delegasaun fundasaun ne’ebé hili sai nu’udar mellór profesór iha tinan 2021 liuhosi selesaun rigorozu.
“Osan ne’ebé simu atu sosa tratór hodi halo atividade natar ho objetivu atu hanorin estudante atu apreende mós halo to’os,” nia tenik.
Vicente Marçal da Silva hanesan manán-na’in prémiu hosi PMCAF no sai mellór profesór ba tinan 2021, hodi hetan orsamentu $10.000.
Prémiu ne’e hodi implementa programa merenda eskolár iha Pre-Eskolár Buruma, Ensinu Báziku turnu 1 no 2, inklui reabilita Eskola Ensinu Bázika Filiál (EBF) Lutumutu.
Prinseza Tailándia, Maha Chakri nu’udar oan hosi Liurai Tailándia ne’ebé fó atensaun ba setór edukasaun, nune’e kada tinan-rua oferese prémiu mellór profesór ba manorin na’in.
Jornalista : Natalino Belo
Editora : Julia Chatarina
