CNE Covalima seidauk simu orientasaun rekruta OSE ba eleisaun xefe suku
COVALIMA, 07 agostu 2023 (TATOLI)–Diretór Komisaun Nasionál Eleisaun (CNE, sigla portugés) Covalima, Hermenegildo de Sena, hateten CNE seidauk simu orientasaun hosi nasionál atu hala’o rekrutamentu ba Ofisiál Supervizaun Eleisaun (OSE) hodi prepara ba eleisaun xefe suku iha Covalima.
“Iha 26 fulan-jullu, ami realiza enkontru ne’ebé hala’o iha munisípiu Baucau partisipa hosi diretór CNE munisipál, xefi departamentu no komisária sira, oinsá atu ko’alia kona-ba preparasaun rekrutamentu ba eleisaun lideransa komunitária maibé seidauk iha desizaun. Ho nune’e, hein hela aprovasaun Orsamentu Retifikativu ne’ebé sei aprezenta ba Konsellu Ministru (KM),” Hermenegildo de Sena hateten ba jornalista sira iha resintu edifísiu CNE Covalima, Tabakolot, segunda ne’e.
Bazeia ba enkontru ne’ebé hala’o iha munisípiu Baucau ne’e, seidauk iha orientasaun tanba bainhira iha tempu badak Orsamentu Retifikativu aprezenta ba Konsellu Ministru no aprovasa ona mak hafoin CNE sei halo rekrutamentu ba Ofisiál Supervizaun Eleisaun, ne’ebé sei dezloka tuir aldeia no suku ne’ebé eziste.
Munisípiu Covalima iha nia suku hamutuk 30 ho aldeia 148, nune’e sei dezloka OSE to’o aldeia no suku ne’ebé eziste iha Covalima.
Nia dehan, fulan-agostu ne’e CNE sei hahú anúnsia vaga ba preparasaun eleisaun ba lideransa komunitária.
Tuir dadus husi Sekretáriu Tékniku Administrasaun Eleitorál (STAE) Covalima, totál eleitór iha Covalima ne’ebé mai hosi postu administrativu Fatululik, Fatumea, Fohorem, Fatumea, Tilomar, Maucatar, Zumalai no Suai hamutuk 49,469 ne’ebé kompostu hosi mane hamutuk 2.5220 no feto hamutuk 2.4216.
Aleinde ne’e, STAE mós rejista eleitór ne’ebé tiha ona iha Covalima ne’e hamutuk nain-353 ne’ebé kompostu hosi mane na’in-186 no feto hamutuk 167.
Entretantu, bazeia ba dadus iha tinan 2022 nian, STAE Covalima rejista eleitór elijível hamutuk 48830 ne’ebé kompostu hosi mane hamuruk 24950 no feto hamutuk 23880.
Jornalista : Celestina Teles
Editór : Cancio Ximenes
