DILI, 07 agostu 2023 (TATOLI)–Embaixadór Timor-Leste ba Brunei Darussalam, Abel Guterres, aprezenta investidór Stratacom Global ba Ministru Petróleu no Rekursu Minerál, Francisco da Costa Monteiro, hodi hato’o interese hakarak investe.
“Sira (Stratacom Global) hakarak halo explorasaun ba poténsia negósiu barak iha Timor-Leste, parte barak mak sira hakarak foku hanesan turizmu, indústria iha munisípiu Baucau no Dili,” Ministru Francisco Monteiro hateten hafoin ramata enkontru ho delegasaun hosi Stratacom Global, iha Gabinete Ministériu Petróleu no Rekursu Minerál, Farol, segunda ne’e.
Notísia relevante : Investidór internasionál 43 interese investe iha Timór
Aleinde ne’e, empreza aprezenta mós ninia interese atu investe iha setór mina no gás, maibé detallu liu sei iha diskusaun téknika iha futuru.
“Sei hakle’an hodi haree saida mak sira bele lori mai, saida mak ita bele fasilita, liuhosi ministériu relevante bele fó, dentro de prosedimentu legál no regulamentu ne’ebé mak iha hodi nune’e, sira bele investe iha futuru, ita presiza kria empregu no kria atividade ekonómika,” governante ne’e akresenta.
Investidór Stratacom Global mai ona dala-tolu iha Timor-Leste, hodi aprezenta projetu investimentu ba parseiru no Governu hodi inklui iha programa, liu-liu ba área konstrusaun komplexu turístiku, parke industriál, instalasaun ba produsaun enerjia renovável no infraestrutura seluk.
Jornalista : Antónia Gusmão
Editora : Julia Chatarina
