BAUCAU, 07 agostu 2023 (TATOLI) — Governu liuhosi Servisu Munisipál Rejistu Sivíl no Konservatóriu Notariadu Baucau, rekoñese kestaun burokrasia iha atendimentu sertidaun RDTL iha Baucau, tanba ho erru ne’e halo idoza ida ho inisiál JR lakon vida.
Diretór Servisu Munisipál Rejistu Sivíl no Notariadu Baucau, Marcelino Gama, espresa sentimentu triste no hato’o sentida kondolénsia ba família tanba JR hamutuk ho la’en-kaben akompaña hosi oan mane hosi suku Abafala, postu administrativu Quelicai atu trata dokumentu Sertidaun RDTL.
“Ita rekoñese duni erru ne’ebé ohin akontese ona, ha’u labele defende maibé futuru ita sei hadi’a erru labele akontese tán,” Diretór Servisu Munisipál Rejistu Sivíl no Konservatóriu Notariadu Baucau hateten iha Ospitál Rejionál Eduardo Ximenes (HorEX, sigla portugés), Vila Nova, segunda ne’e.
Rejistu Sivíl no Konservatóriu Notariadu Baucau durante atendimentu sidadaun sira aplika fahe númeru antrian ba joven sira no aplika sistema atendimentu espesiál ba sidadaun idade idozu inklui ema ho defisiensia, inan isin-rua atu direita halo tratamentu sein liuhosi númeru antrian.
Domingos Gama, salienta, tuir informasaun hosi família katak saudoza JR antes ne’e sofre moras fuan nune’e ohin atake iha fatin Rejistu Sivíl no hakotu iis, maske halo tratamentu ona iha HorEX.
“Ita ho família la espera, tuur hela derrepenti monu no la konsege salva nia vida,” Marcelino Gama akresenta.
Marcelino Gama, hateten, sidadaun hotu iha direitu atu ko’alia kona-bá sistema atendimentu iha Rejistu Sivíl no Konservatóriu Notariadu maibe sistema estabelese hodi fó prioridade ba idozu, ema ho defisiénsia, inan isin-rua bazea ba oreintasaun hosi Ministériu Justisa.
Servisu Munisipál Rejistu Sivíl no Konservatóriu Notariadu Baucau hato’o ona proposta ba nasionál atu direitamente halo atendimentu ba komunidade iha baze hanesan iha postu Venilale, Baguai, Laga no Vemasse.
Nune’e iha Governu anteriór konsege finaliza tratamentu dokumentu no distribui ona Billete Identidade (BI) iha postu Venilale, enkuantu postu tolu seluk seidauk realiza tanba hein desizaun hosi ministériu.
Notísia relevante: Idoza ida lakon vida bainhira trata sertidaun RDTL iha Baucau
Jornalista: Natalino Belo
Editór: Evaristo Soares Martins
