Komisaun B kestiona guarda prizionál mantein ho nível 2-3
DILI, 07 agostu 2023 (TATOLI)—Vise Prezidente Komisaun B trata asuntu Negósiu Estranjeiru no Defeza ho Seguransa, Luís Roberto, foti kestaun funsionáriu guarda prizionál komesa hala’o serbisu dezde tinan 2000 to’o agora, sira nafatin mantein ho nível 2 ho 3.
Nia husu ba IX Governu Konstitusionál iha polítika ida oinsá hasa’e nível guarda prizionál sira-nian, tanba presta serbisu kle’ur ona.
“Sira-nia avaliasaun dezempeñu hato’o duni ba Komisaun Funsaun Públika (KFP), maibé dalaruma asaun ida atu promove sira, tanba ne’e ita presiza haree,” Luis Roberto levanta kestaun ne’e liuhosi reuniaun plenária PN, segunda ne’e.
Aleinde ne’e, Deputada bankada KHUNTO iha Parlamentu Nasionál (PN), Olinda Guterres, husu IX Governu Konstitusionál liuhosi ministériu tutela atu iha Orsamentu Retifikativu (OR) 2023 prevee orsamentu hodi sosa karreta foun ba estabelesimentu prizionál sira.
“Númeru prizoneiru iha estabelesimentu prizionál tolu aumenta. Preokupasaun ba sira karreta atu tula sira mai tuir julgamentu karreta laiha, balun iha maibé aat. Se fasilita sira atu tula prezu sira mai iha dalan karreta falla oinsá,” Deputada Olinda levanta kestaun ne’e liuhosi reuniaun plenária PN, segunda ne’e.
Nia husu ba Ministéiru Justisa (MJ) atu konsidera tau iha planu no Orsamentu Retifikativu (OR), 2023 ka iha Orsamentu Jerál Estadu (OJE) 2024 hodi solusiona.
Deputadu KHUNTO, António Verdiál de Sousa, sekunda mós viatura ne’ebé guarda prizionál sira uza jeralmente avaria, nune’e difikulta tebes serbisu operasionál guarda prizional sira, nune’e presiza sosa karreta foun.
“Ha’u fó ezemplu, hanesan prezu sira atu ba tuir julgamentu iha Tribunál Suai, Baucau presiza tebes transporte. Husu ba IX Governu Konstituisionál liuhusi Ministéiru Justisa atu prioriza iha Orsamentu Retifikativu atu tau osan hodi sosa karreta foun, nune’e fasilita guarda prizional sira nia serbisu,” nia hateten.
Vise Ministru Asuntu Parlamentár, Adérito Hugo da Costa, hateten asuntu menus karreta ne’e nia parte hakarak relembra fali polítika ba jestaun liga karreta Estadu ninian ne’ebé konsentra iha patrimóniu iha Governu anteriór kria ona polítika ida.
“Ha’u lamenta tebes, kuandu rona informasaun liña ministéiru sira la inteira desizaun Governu sentrál nian ba frota karreta nian, ne’ebé konsentra hotu iha jestaun patrimóniu nian, kuandu liña ministeriál infrenta menus karreta bele husu pedidu asesu ba karreta ne’ebé Governu anteriór halo ona jestaun foun,” nia hateten.
Jornalista : Nelson de Sousa
Editór : Cancio Ximenes
