Natar ektare 523 iha Raimea ameasadu sei abandona
COVALIMA, 07 agostu 2023 (TATOLI)–Diretór Servisu Munisipal Agrikultura Covalima, Reinaldo Coli, hateten natar ektare 523 iha suku Raimea, postu administrativu Zumalai, munisípiu Covalima ameasadu sei abandona.
“Ita sei halo kultivasaun durante ne’e sei abandona hela, maibé nieneik kada époka ita sei haree hosi fatin ida ba fatin seluk. Tanba ne’e, foin lalais, ita foku ba iha irrigasaun Oebaba konstrui ho orsamentu ne’ebé boot tanba nia área potensiál natar ektare 2,262. Maibé agora sai hanesan área kultivasaun utiliza irrigasaun iha Oebaba, ita foin atinje ektare 1,696 sai ona área kultivasaun no natar ektare 523 ameasadu sei abandona,” Reinaldo Coli hateten ba Agência Tatoli, iha resintu AMC Sukaer Laran, segunda ne’e.
Polítika Ministériu Agrikultura no Peska (MAP) atu loke natar ne’ebé sei abandona hanesan iha Oebaba, suku Raimea ne’e iha natar ektare 523 mak abandonadu.
“Ami hahú halo ona identifikasaun no tékniku mós mobiliza rai na’in sira-ne’ebé abandona. Ami hala’o ona enkontru faze dahuluk nian no ami prepara atu halo normaliza mota Weluli atu halo sedimentu área natar durante ita prepara eskavatór,” nia dehan.
Iha bairru área Oebaba, suku Raimea, natar ne’ebé durante utiliza irrigasaun Kay Rala Xanana Gusmão maibé haree área barak sei abandona, tanba polítika Governu ida-ne’e sei haree área abandona, ida-ne’e sai hanesan área kultivasuan iha Oebaba ne’ebé iha ektare 2,262 sai hanesan área kultivasaun.
Bazeia ba rezultadu enkontru aproximasaun ho rai nain sira mós orgulu, durante atu loke tanba sira laiha forsa atu halo natar, iha ai boot sira, nune’e tuir polítika sei dudu ai sira-ne’e hodi bele loke natar.
Aleinde natar ektare 523 abandona iha suku Raimea, postu Zumalai, munisípiu Covalima, iha suku Suai Loro, postu Suai, munisípiu Covalima ektare 300-resin ameasadu sei abandona, nune’e Servisu Munisipal Agrikultura Covalima sei halo lavantamentu dadus.
Antes ne’e, iha 27 fulan-setembru 2022, eis Diretór Servisu Munisipal Agrikultura Covalima, Domingos Gusmão, fó sai dadus produsaun hare-kulit agrikultura munisípiu Covalima kollete ona hare-kulit ne’ebé agrikultór sira hasa’e produsaun tonelada 9885.58.
Dadus preliminária sira-ne’e mai hosi estensionista sira rekolla mai hosi postu administrativu Fatumea, Suai no Zumalai ho nia totál área potensiál 12.167, área kultivasaun 2069,35 produtividade 3.79 ho totál produsaun 9885.58.
Hosi dadus prelimináriu ne’ebé eis diretór relata kada área ho nia kultivasaun kada postu administrativu diferénsa hanesan iha postu Fatumea área potensiál 93, área kultivasaun 62 produtividade ho nia produsaun 232.36
Iha postu Suai, área potensiál 3809, área kultivasaun 495.75, produtividade 3.90 ho nia produsaun 2245.48.
Iha postu Zumalai, área potensiál 8265, área kultivasaun 15,116, produtividade 4.47, ho nia produsaun 7407.74
Jornalista : Celestina Teles
Editór : Cancio Ximenes
