DILI, 07 agostu 2023 (TATOLI)—Deputadu bankada FRETILIN iha Parlamentu Nasionál (PN), António Calau, husu Governu liuhosi parte kompetente presiza tau atensaun ba komunidade balun iha Dili ne’ebé susar asesu ba bee-moos.
Notísia Relevante: Komisaun E bolu Governu hatán keixa komunidade Kuluhun la asesu bee-moos
“Preokupasaun bee-moos iha munisípiu Dili, horisehik ha’u tun ba iha terrenu iha komunidade ne’ebé nafain halerik ba bee-moos,” nia levana liuhosi reuniaun plenária PN, segunda ne’e.
Deputadu ne’e nota iha kapitál Dili komunidade balun susar asesu bee-moos, entaun sira deside sosa bee-moos.
“Ha’u nota, iha área lubun ida presiza intervensaun imediata hanesan iha Tasi-Tolu, Kampung Baru, Ailok-Laran, Fatumeta, Bairru Pite, Taibesi, Becora no Camea foho leten ne’e sosa bee fula-fulan no fulan ida sosa bee-moos dala tolu iha aldeia ida Aílelehun no Hera,” nia dehan.
Nia husu ba Governu atu halo intervensaun imediata, ho difikuldade sira-ne’e bele tau iha planu atu responde iha tempu badak no tempu naruk, maibé atendimentu urjente agora tama ona tempu bailoron ne’e komunidade sosa bee-moos.
Vise Ministru ba asuntu Parlamentár, Adérito Hugo da Costa, rejista preokupasaun sira-ne’e sei hato’o ba parte kompetente atu tau atensaun.
Jornalista : Nelson de Sousa
Editór : Cancio Ximenes
