STAE sei dezloka tékniku REABD ba postu administrativu sira
COVALIMA, 07 agostu 2023 (TATOLI)–Sekretáriadu Tékniku Administrasaun Eleitorál (STAE) Covalima, sei dezloka tékniku na’in-rua hosi Resensiamentu Eleitorál Apoiu Baze Dadus (REABD) ba postu administrativu sira atu halo atendimentu.
“Agora ita hala’o rekrutamentu bazeia reanúnsiu vaga ba postu administrative sira. Ita-nia tékniku nain-14 dezloka ba postu administrativu sira hodi hala’o servisu no halo atendimentu ba sidadaun sira ba resensiamentu eleitorál no apoiu baze dadus (REABD),” Francisco Gusmão hateten ba jornalista sira iha nia kna’ar fatin, Kampung Baru, segunda ne’e.
STAE reanúnsiu vaga atu hala’o rekrutamentu tékniku na’in-rua hanesan operadór no asistente atu dezloka ba postu administrativu sira hodi halo atendementu sidadaun sira halo resensiamentu eleitorál ne’ebé hala’o servisu durante fulan-lima (5) hodi halo preparasaun ba eleisaun ba xefe suku sira.
Prosesu rekrutamentu tékniku no asistente atendimentu sidadaun sira halo Resensiamentu Eleitorál Apoiu Baze Dadus (REABD) iha postu administrative sira, STAE finaliza ona simu dokumentu hosi kandidatu sira no agora tama iha faze entrevista.
STAE reanúnsiu vaga ne’e hahú iha 21 fulan-jullu ne’ebé ramata iha 28 fulan-jullu no nia rezultadu selesaun dokumentu públika iha 30-31 jullu, ne’ebé hahú faze entrevista iha loron 07-10 fulan-agustu tinan 2023 ne’e.
Tuir dadus, kandidatu ne’ebé submete dokumentu ba Sekretáriadu Tékniku Administrasaun Eleitorál (STAE) hamutuk na’in-28, no hosi númeru ne’e STAE presiza kada postu administrativu na’in-rua, entaun hamutuk na’in-14.
Entretantu, munisípiu Covalima ho nia postu Administrativu Fatululik, Fatumea, Fohorem, Fatumea, Tilomar, Maucatar, Zumalai no Suai ho nia suku hamuruk 30 no iha aldeia hamuruk 184.
Jornalista : Celestina Teles
Editór : Cancio Ximenes
