Antigu Militár Manufahi-oan utiliza rai ektare 16 halo atividade kooperativa
MANUFAHI, 08 agostu 2023 (TATOLI)—Sekretáriu Estadu Kooperativa, Arsénio Pereira da Silva akompaña hosi Administradór munisípiu Manufahi, Arantes Isaac, tersa ne’e, halo lansamentu dahuluk husik fahi ba luhan iha kooperativa multi-sektoriál ne’ebé harii hosi antigu Militár Manufahi-oan ne’ebé halibur malu, iha munisípiu Manufahi.
“Ho prezensa Sekretáriu Estadu nian, ami hakarak husu apoia liu-liu bee-moos, tanba ida-ne’e mak ami-nia preokupasaun aleinde eletrisidade tanba ami hato’o ona pedidu ba Eletricidade de Timor-Leste, Empreza Públika (EDTL, E.P) Manufahi maibé seidauk iha resposta, husu mós apoia rede ba haleu lutu ba rai ektare 16 no harii sentru kooperativa,” Prezidente koperativa multi-sektoriál, Milton da Costa Pereira, hateten hafoin lansamentu atividade kooperativa iha aldeia Sesurai, suku Betano, postu administrativu Same Vila, munisípiu Manufahi.
Objetivu antigu Militár Manufahi-oan halibur malu harii kooperativa multi-sektoriál hodi ajuda ekonomia família.
Nune’e, kooperativa ne’e harii iha tinan 2021 ho membru na’in-28, ne’ebé hetan fundu dahuluk hosi membru sira kada ema kontribui $45, ho totál kapitál akumuladu $1.260.
“Inisiativa halibur eis-militár harii kooperativa ne’e katak bainhira krize iha tinan 2006 sai entaun ida-idak la’o la hatene tuir dalan, entaun ho dalan harii kooperativa oinsá atu halibur malu fali. Governu anteriór apoia orsamentu $12.500 iha loron 08 janeiru 2023 ba ezisténsia grupu nian ne’ebé utiliza halo fahi luhan hamutuk 30 no mákina prosesamentu hahán animal,” Milton da Costa, relata.
Notísia relevante : Kooperativa kréditu Maubisse ‘Hanoin ba Futuru’ akumula ona kapitál $414.000
Fahi luhan ne’ebé lansa uluk hamutuk 17, ne’ebé kada luhan sei hakiak fahi másimu haat depende ba medida fahi.
Iha biban hanesan, Sekretáriu Estadu lansa prosesamentu hahán ba animál hanesan fahi, ne’ebé hahán sira ne’e mai hosi produtu lokál hanesan akar, batar, marungi tahan no ikan ruin. Produtu hirak ne’e halo rahun tiha maka dulas ho mákina, hafoin fó han fahi.
Sekretáriu Estadu Kooperativa dehan, Governu komprometidu katak sei halo buat ruma hodi apoia kooperativa sno sidadaun sé de’it ne’ebé mak hakarak halo atividade ekonómika iha ida-idak nia fatin.
“Ha’u garante katak ho ita-nia servisu hamutuk Governu ho kooperativa no produtór sira hanoin ita sei halo buat ruma ne’ebé sei filafali mai ita, signifika ho atividade ekonómika sira ne’e ita bele hasa’e ekonomia família,” governante ne’e otimista.
Nia apresia ho inisiativa di’ak antigu militár Manufahi-oan sira nian no garante Governu prontu servisu hamutuk hodi dezenvolve di’ak liután.
Nune’e mós, Administradór munisípiu Manufahi, Arantes Isaac, konsidera inisiativa ne’e bele ajuda Estadu hodi kontribui ba dezenvolvimentu ekonomia.
“Ne’e buat ida importante tebes, ho hanoin sira ne’ebé iha, ne’e buat di’ak ida ba dezenvolvimentu ita-nia rain, tanba ko’alia kona-ba dezenvolvimentu, Governu mesak de’it labele, tenke mós envolve komponente hotu hodi bele dezenvolvimentu ita-nia rain ne’e ho di’ak. Setór koperativa nu’udar setór importante tebes, hodi redus produtu importasaun sira, liu-liu hanesan na’an tanba ita-nia rain barak mak produtivu no bele dezenvolve,” Arsénio adianta.
Jornalista : Antónia Gusmão
Editora : Julia Chatarina
