DILI, 08 agostu 2023 (TATOLI)—Embaixadór Koreia Súl iha Timor-Leste, Shin Mantaek, hasoru malu ho Vise Primeiru-Ministru no Ministru Koordenadór Asuntu Ekonómia no Ministru Turizmu no Ambiente, Francisco Kalbuadi Lay, tersa ne’e, hodi ko’alia kona-ba kooperasaun serbisu iha futuru.
“Daudaun ne’e ita seidauk iha kooperasaun espesiál ba área turizmu nian, maibé ami ko’alia hela oinsá atu imi hatene illa Jeju-do iha Koreia Súl ne’ebé koñesidu nu’udar fatin turizmu ne’ebé furak, atu ba oin iha kooperasaun transforma Ataúro sai hanesan illa Jeju-do, maski agora iha hela planu nia-laran,” Embaixadór Shin Mantaek, hateten hafoin hasoru malu ho Ministru Kalbuadi iha Gabinete, Farol.
Notísia relevante : Governu Koreia Súl entrega ona livru 2.000 ba SEFOPE
Diplomata ne’e dehan, nia parte hato’o ona asuntu turizmu ne’e ba Ministru Turizmu no Ambiente.
“Daudaun iha hela faze planeamentu tanba iha maiu foin lalais Prezidente Repúblika, Ramos Horta bá Jeju-do hasoru ho Maiór Jesu no Maiór hateten rasik sei mai Timor-Leste atu ami bele ko’alia detallu liután,” Shin tenik.
Iha fatin hanesan, Ministru Turizmu no Ambiente, Francisco Kalbuadi Lay, agradese tebes tanba Embaixada Koreia Súl iha Timor-Leste prontu hamutuk ho Korea International Cooperation Agency (KOICA) koopera nafatin ho Timor-Leste iha área turizmu no ambiente.
“Área ambientál ami ko’alia kona-ba ekonomia matak hanesan kuda ai no seluk tan, ne’ebé sira prontu koopera nafatin ho ita,” governante ne’e adianta.
Jornalista : Arminda Fonseca
Editora : Julia Chatarina
