DILI, 08 agostu 2023 (TATOLI)—Banku Sentrál Timor-Leste (BCTL, sigla portugés) lansa relatóriu trimestrál ba dala-LXVII Fundu Petrolíferu Timor-Leste, ne’ebé kobre períodu loron 01 abríl to’o 30 juñu 2023, hatudu montante ikus biliaun $18,075.
“Relatóriu ne’e hatudu katak kapitál Fundu Petrolíferu iha trimestre ikus ne’e biliaun $18,075, kompara ho fim trimestre dahuluk ho montante biliaun $17,691, hafoin ajusta tiha Fair Value dívida privada tinan 2022,” refere nota hosi BCTL ne’ebé Agência Tatoli asesu, tersa ne’e.
Enkuantu, reseita ne’ebé simu iha trimestre ne’e hamutuk millaun $332,21, rendimentu brutu hosi investimentu fundu pozitivu millaun $248,025, kompostu hosi kupaun no dividendu ne’ebé simu millaun $123,73, mudansa iha valór merkadu nian pozitivu millaun $117,59 no movimentu cambiais pozitivu millaun $6,70 iha trimestre ne’e.
“Ne’e rezulta rendimentu ba karteira fundu durante trimestre ne’e 1,39%, enkuantu rendimentu sasukat (benchmark) nian ba períodu ne’e 1,48%,” nota hosi Banku Sentrál relata.
Notísia relevante : Fundu minarai biliaun $17,832 iha trimestre dahuluk 2023
Osan kontadu brutu fundu nian hosi kontribuisaun kontribuinte hamutuk millaun $332.21, osan kontadu líkidu ne’ebé sai hosi fundu durante trimestre ne’e hamutuk millaun $192,856, kompostu hosi millaun $190 transfere ba Orsamentu Estadu no millaun $2,856 kobre kustu jestaun nian.
Rendimentu totál portofóliu fundu iha trimestre ne’e 1,39% enkuantu rendimentu sasukat iha períodu ne’e mak 1,48%, no rendimentu portofóliu instrumentu merkadu finanseiru iha períodu ne’e mak 1,43%, kompara ho rendimentu reférensia 1,53%.
Kona-ba Fair Value ba dívida privada iha dezembru 2022 mak millaun $560,76, reflete iha ativu finanseiru iha presu merkadu nian.
Lei Fundu Petrolíferu espesífika katak BCTL hanesan ajente responsável ba jestaun operasionál Fundu Petrolíferu nian, enkuantu Ministériu Finansa mak responsabiliza atu estabelese estratejia investimentu tomak fundu ne’e nian.
BCTL jere ona portofóliu besik liu ho pontu referénsia iha trimestre dala-72 dahuluk, diferénsia entre retornu totál portofóliu no pontu referénsia iha períodu ne’e -0,09 pontu baze ka -9%. Dezempeñu retornu fundu hahú hosi inísiu 4,13%.
Jornalista : Arminda Fonseca
Editora : Julia Chatarina
