Loron internasionál juventude enkoraja joven partisipa iha dezenvolvimentu sustentavél
COVALIMA, 08 agostu 2023 (TATOLI)–Diretór ezekutivu Centro Juventude Covalima (CJC), Calisto Leite Gusmão, hateten Governu servisu hamutuk Organizasaun Internasionál UNFPA ne’ebé organiza hosi CJC iha ámbitu komemora loron internasionál juventude iha Covalima ho tema “Abilidade verde ba juventude iha dezenvolvimentu sustentavél ba mundu”.
“Razaun hili tema ida-ne’e atu hasa’e konxiénsia no promeve joven sira oinsá joven bele partisipa iha dezenvolvimentu komunitária no enkoraja joven sira iha partisipasaun ativu liga ho dezenvolvimentu sustentavél,” Calisto Leite Gusmão hateten ba jornalista sira iha salaun Eskola Sekundária Jerál Suai, tersa ne’e.
Nia husu estudante no joven sira tenke estuda makaas, tanba se lae sai joven hela de’it naran no joven-sira labele makaas iha retórika no krítika maibé mamuk iha prátika, nune’e husu joven sira tenke hatudu ho asaun.
Ministériu Juventude Desportu Arte no Kultura (MJDAK) liuhosi Diretór Jerál, David Tomas de Deus, enkoraja joven sira partisipa semináriu ho sériu nune’e bele aprende iha ámbitu komemorasaun loron Internasionál Juventude ne’ebé kada tinan mundu selebra iha kada lron 12 fulan-agostu.
“Joven sira, hakarak enkoraja ita-boot sira partisipa semináriu hodi komemora loron internasionál la’ós mai naran partisipa no hodi buka rame de’it, maibé mai atu bele aprende buat ruma,” David Tomas de Deus hateten.
Atividade semináriu ida-ne’e hodi bele hasa’e joven-sira nia koñesementu liuhosi atividade ne’ebé hala’o iha munisípiu Covalima, nune’e joven-sira bele konstribui ba Objetivu Dezenvolvimentu Sustentavél (ODS).
Atvidade semináriu ne’e, organiza husi Centru Juventude Covalima (CJC) ne’ebé oradór dahuluk Diretór jerál Ministériu Juventude Desportu Arte no Kultura konaba Abilidade verde ba juventude iha dezenvolvimentu sustentavél ba mundu no oradór daruak hosi Organizasaun Internasionál FAO, Juanico Oliveira, hasa’e oportunidade ba empregu rurál liuhosi promosaun programa sempre verde.
“Governante espera liuhosi atividade semináriu no seluk tan bele hasa’e ita-nia joven sira-nia koñesementu liuhosi atividade ne’ebé ita realiza joven-sira bele kontribui ba ita-nia rai rasik no kontribui ba Objetivu Dezenvolvimentu sustentavel (ODS),” nia hateten.
Kada tinan sempre komemora loron internasionál Juventude ne’ebé sei monu iha loron 12 fulan- agostu, ne’ebé realiza atividade oioin ho tema abilidade verde ba juventude iha dezenvolvimentu sustentavél ba mundu.
Governu komemora loron internasionál juventude la’ós iha munisípiu ida-de’it maibé hala’o rotativa, nune’e bele fó hanoin ba juventude katak Timor-Leste kada tinan sempre komemora loron internasionál ba juventude.
Governu liuhusi Ministériu Juventude Desportu Arte no Kultura hetan apoiu hosi UNFPA liuhosi Centro Juventude Covalima (CJC) hodi organiza aitividade oioin ba joven-sira hahú atividade semináriu to’o ramata.
Komemorasaun Loron Internasionál Juvetude iha Covalima ho nia tema Abilidade verde ba juventude iha dezenvolvimentu sustentavél ba mundu ne’e, relevante tebes tanba liga liu ba ambiénte ne’ebé tinan ne’e hasoru dezastre naturál hodi halo rai-monu no estraga infraestrutura.
Mosu dezastre naturál tanba sidadaun sira ladún kuidadu ambiénte tesi ai no soe foer arbiru la tau iha nia fatin, nune’e bainhira iha tempu udan sempre hamosu dezastre naurál hanesan inundasaun, rai halai no seluk tan.
Reprezentante Administradór Munisípiu Covalima, Francisco de Jesus Alves, hateten komemorasaun loron internasionál ba juventude hanesan loron ne’ebé importante tebes ba mundu espesiál ba joventude sira iha munisípiu Covalima.
“Ohin, iha Covalima, ita mós komemira loron internasionál ba joven sira sai hanesan reflesaun ba joventude iha mundu, espesiál ba joventude sira iha Covalima ho tema ne’ebé iha refleta ho situasuan riil iha Timor-Leste, lori ita-nia nasaun ba iha mundu,” nia dehan.
Komemorasaun loron internasionál ba juventude hanesan loron reflesaun ba joven sira hodi prepara aan tuir situasaun ne’ebé moris iha ámbitu globalizasaun ka dijitalizasaun ne’e, jovens sira tenke apar ho teknolojia.
Autoridade Covalima mós enkoraja joventude sira tenke esforsu estuda makaas, nune’e bele kompete iha mundu.
Juventude tenke iha inovasaun no transformasaun iha ida-idak nia aan no iha revolusaun fizika hodi buka ukun rasik aan maibé juventude ohin loron presiza revolusaun mental hodi adapta aan ba teknólojia.
Iha iámbitu komemora loron internasionál ba juventude ne’e, Centro Juventude Covalima realiza atividade sira hanesan semináriu, doasan raan, jogu amizade, komepetisaun diskursu públiku nivél ensinu sekundáriu, limpeza jerál, vizita fatin auto empregu hosi CJC, kompetisaun tebe orijinál, marsa saudavél, sa’e bua, dada tali no halai taru karun.
Jornalista : Celestina Teles
Editór : Cancio Ximenes
