MALIANA, 07 agostu 2023 (TATOLI) – Programa Nasionál Dezenvolvimentu Suku (PNDS) Munisípiu Bobonaro, daudaun ne’e enfrenta hela problema menus rekursu umanu atu kontrola projetu, tanba IX Governu deside hapara funsionáriu kazuál sira hosi servisu iha loron 30 juñu 2023 ne’e.
Tuir dadus PNDS mnunisípiu Bobonaro iha funsionáriu hamutuk na’in-52 komposta hosi permanente na’in-26 no kazuál na’in-28.
“Ha’u-nia staff sira para ne’e, sira kazuál sira mak barak liu permanente, ha’u iha 28 kazuál, balu tékniku atu haree projetu, tékniku finansa no tékniku sosiál nian,” Diretór PNDS Bobonaro, Paulino Viegas Tilman, ko’alia iha Maliana.
Diretór Paulino, esklarese politikamente mak IX governu hapara, maibé legalmete seidauk, tanba funsionáriu kazuál hirak-ne’e kontratu sei válidu hela.
Nia konfirma, kauzuál sira asina kontratu dahuluk tinan 2023 hahú iha fulan-janeiru to’o marsu no extende tán hahú hosi loron 01 fulan-abríl to’o loron 30 fulan-setembru.
“Ida-ne’e mak kria dilemah ida mai ami, atu haruka sira mós ami, desizaun verbál ne’e ami la respeita, sei haruka servisu no haruka servisu mós se ema la selu, sé mak atu selu, kestaun iha-ne’e,” nia katak.
Enkuantu funsionáriu hirak-ne’e la ativu ona servisu, maibé PNDS seidauk bele rekolla fasilidade sira hanesan motorizada no laptop tanba seidauk iha orientasaun klaru.
Diretór Paulino hakle’an, desizaun refere sei fó impaktu maka’as atu aselera projetu sira iha terrenu, liuliu Uma Naroman ba Povu (UNP) faze daruak nian.
Maske nune’e dadaun ne’e implementasaun UNP 2022 iha suku Lahomea inklui suku sira iha kapitál Maliana finaliza ona, maibé suku balu iha liu área rurál hanesan Kolimau atrazu, tanba foin asesu estrada.
Diretór PNDS Bobonaro hatutan, iha suku Mali-Ubu, postu administrativu Bobonaro ninia progresu fíziku la’o atrazu liu.
“Nia asesu estrada di’ak hela, maibé ema atu servisu mak menus, ita orienta ba sira seidauk halo nafatin, ita orienta ohin, semana oin ita ba fali haree mós la la’o, dalaruma sira preokupa tiha lia adat nian, abandona tempu naruk hodi atraza projetu,” nia kestiona.
Entretantu UNP faze daruak ne’ebé implementa iha munisípiu Bobonaro hamutuk unidade 459 kobre suku 50.
Notísia relevante: PAM Bobonaro sei orienta APA neen fiskaliza projetu PNDS
Jornalista : Sérgio da Cruz
Editór : Evaristo Soares Martins