BAUCAU, 09 agostu 2023 (TATOLI) – Ospitál Referál Eduardo Ximenes (HorEX, sigla Portugés) menus ai-moruk hodi halo atendimentu ba pasiente ne’ebé atu halo taratamentu.
Xefi departamentu sala emerjensia no ambulatóriu, Claudino Ximenes, esplika, ospitál hasoru situasaun menus ai-moruk hanesan analgesik liuliu tableta kompostu buskopan, ibuprofen, diknofenak no injkesaun uniku diklofenak mak iha maibe minimu.
“Maske menus ai-moruk maibe pesóal saúde sira prontu nafatin halo atendimentu ba moras ho subtituisaun aimoruk seluk ne’ebé iha relasaun ho moras,” Xefe departamentu emerjensia no ambulatóriu HorEX hateten iha Vila Nova, kuarta ne’e.
Alende ne’e, antibioteka laiha ai-moruk ampicilin, ai-moruk ba iis-boot hanesan idrokortison no kanula tipu númeru 20,22 no 24 ne’ebé menus besik fulan-haat ona.
Maske nune’e, dirijente ospitál halo esforsu hodi husu apoia ai-moruk ba sentru, postu saúde no klinika sira hodi halo atendimentu ba pasiente sira-ne’ebé halo tratamentu saúde iha HorEX Baucau.
“Ai-moruk sira-ne’e karik iha augenta to’o semana-rua depois ne’e menus fali kauze fulan-rua maibe ampicilin hahú kedas iha fulan-abríl,” Claudino Ximenes akresenta.
Nune’e HorEX Baucau fahé deit parasetamol ba pasiente sira sofre moras ulun inklui subtitui ampicilin ba setriapson no amoxolin ne’ebé iha impaktu tanba sei aumenta rezistensia ba konsume ai-moruk.
Claudino Ximenes, husu Ministériu Saúde (MS) atu hamenus burokrasia inklui prevee orsamentu natoon ba SAMES,IP nune’e bainhira kompra ai-moruk iha estoke sufisiente ho durasaun tempu naruk.
HorEX Baucau halo atendimentu ba pasiente sira ne’ebé tratamentu kada-loron masimu nain-60 ho total pesoal saúde hamutuk enfermeiru na’in-tolu no mediku na’in-lima hodi halo rotasaun iha 24 oras.
Jornalista : Natalino Belo
Editór : Evaristo Soares Martins
