Governu partila informasaun ba diretór-koordenadór eskola iha Covalima
COVALIMA, 09 agostu 2023 (TATOLI)–Governu liuhosi Sekretária Estadu Ensinu Sekundáriu Jerál Ensinu Tékniku Vokasionál ho nia ekipa partila informasaun kona-ba situasaun edukasaun ba diretór eskola no koordenadór eskola sira iha munisípiu Covalima.
“Ami mai partila informasaun kona-ba situasaun atuál ne’ebé mak Servisu Edukasaun Covalima enfrenta, tanba ne’e ohin ekipa lubuk ida mai hotu atu halo esplikasaun situasaun ne’ebé ho detalu hanesan projetu Komunitáriu sira, rekursu umanu, estabele eskola téknika ho ensinu sekundáriu,” Sekretáriu Estadu Ensinu Sekundáriu Jerál Ensinu Tékniku Vokasionál, Domingos Lopes Lemos, hateten ba jornalista sira iha salaun Eskola Sekundária Jerál Suai, kuarta ne’e.
Iha enkontru ne’e, ko’alia kona-ba rekursu umanu salariu vensimentu ba kargu xefia sira, remuneratóriu ba professor sira, eskola sekundáriu ba klase paralela sira no Tékniku Vokasionál.
Aleinde ne’e, diretór no koordendór sira mós aprezenta problema hanesan eskola menus komputadór, mobiliáriu, manuál no seluk tan ne’ebé apresenta ba Sekretáriu Estadu Ensinu Sekundáriu Jerál Ensinu Tékniku Vokasionál.
“Problema eskola laiha komputadór, ita tama iha orsamentu retifikativu ne’ebé aprezenta ona ba Ministériu Finansa ba ensinu báziku mós, ita iha ona orsamentu diretór ensinu báziku sira kada estabelesimentu,” nia hateten.
Iha orsamentu retifikativu Governu prevee orsamentu atu sosa komputadór hamutuk 44.000, nune’e bele distribui ba eskola sira liuliu ba ensinu sekundáriu sira iha máteria multimídia.
Diretór Servisu Edukasaun Munisípiu Covalima, Francelino Freitas Carvalho, reprezenta Sekretáriu Estadu Ensinu Sekundáriu Jerál Ensinu Tékniku Vokasionál hala’o vizita hanesan onra boot ba munisípiu Covalima.
“Sekundáriu Jerál Ensinu Tékniku Vokasionál hala’o vizita hanesan onra boot mai ami munisípiu Covalima hanfoin simu pose Covalima hetan privileiju,” nia hateten.
Diretór edukasaun Covalima mós hato’o relatóriu kona-ba kondisaun eskola iha munisípiu Covalima ne’ebé haree infraestrutura liuhosi projetu komunitáriu konstrui ona eskola 16 iha munisípiu Covalima no eskola balun preszja atu hala’o konstrusaun.
Projetu Komunitáriu iha tinan 2023 ne’e, Covalima hetan projetu ualu (8) ne’ebé asina ona kontratu no loke ona konta bankária.
Bazeia ba relatóriu hosi Diretór Servisu Munisipál Edukasaun Covalima totál eskola hamutuk 145 ne’ebé kompostu hosi eskola pre-eskolár públiku no privadu, ensinu báziku ho eskola báziku filiál, eskola sekundáriu jerál públiku no privadu, eskola sekundáriu tékniku vokasionál públiku no privadu, ho totál estudante hamutuk 22,508 ho nia profesór permanente no kontratadu hamutuk 1,114.
Entretantu, hafoin Sekretáriu Estadu Ensinu Sekundáriu Jerál Ensinu Tékniku Vokasionál, Domingos Lopes Lemos ho ekipa finaliza enkontru ho kargu xefia sira kontinua hala’o vizita ba projetu Komunitáriu iha munisípiu Covalima.
Jornalista : Celestina Teles
Editór : Cancio Ximenes
