DILI, 09 agostu 2023 (TATOLI)—Prezidente Repúblika (PR), José Ramos Horta, hateten Estadu Timor-Leste iha osan no husu Governu bele garante estoke foos atu povu labele hamlaha liuhosi hatun presu foos ne’ebé daudaun ne’e sa’e.
“Ha’u hanoin Governu tenke haree didi’ak atu halo saida. Tinan 20 nia laran la halo polítika loloos iha agrikultura. Ha’u ko’alia beibeik tinan 20 nia laran boot sira la rona. Agora, la’ós laiha ona posibilidade, atu halo buat ruma iha rai-laran. Maibé, ita iha fundu petrolíferu, ita iha osan biliaun $18, Governu tenke fó orden autoriza ministériu responsavél buka foos, hahan sira seluk iha mundu ne’e. La interrese nia folin halo estoke boot para povu labele hamlaha, para hatun folin foos,” PR Horta hateten ba jornalista sira iha aeroportu internasionál Nicolau Lobato, Comoro, kuarta ne’e.
Nia dehan, prosesu ne’e halo tiha ona dala ida iha tinan 2009 bainhira akontese krize boot ba foos no Governu fó subsídiu foos ba povu.
“Momentu ne’ebé ha’u hakilar tiha ona investimentu agrikultura no momentu ne’eba Governu book aan ba sosa foos iha Vietname, Tailándia, momentu ne’ebé Governu hahu subsídiu ba foos nian. Ezemplu, foos atu ba too Iliomár dook tebe-tebes, Governu fó subsídiu hodi foos ne’e labele folin liu $12, ne’e mak halo iha tempu ne’eba,” nia hateten.
Tanba ne’e, Governu tenke tau matan makaas fó subsídiu tau folin ne’ebé merkadu nian, se konsege hetan iha merkadu, tanba Índia lakohi faan ona iha merkadu esporta no Vietname ho Tailándia re-negosia tiha ona kontratu uluk sira iha ho rai lubun ida, entaun Governu konsentra iha Orsamentu Retifikativu.
Tuir nia, buat ne’ebé nia parte analiza situasaun sei aat liután internasionalmente, aat liután problema El-ninu rai barak sei maran, hanoin ne’e preokupasaun dahuluk Governu nian.
Jornalista : Nelson de Sousa
Editór : Cancio Ximenes
