BOBONARO, 09 agostu 2023 (TATOLI) – Autoridade Munisipál Bobonaro no kargu xefia sira no xefe suku 18 iha postu administrativu Bobonaro hamutuk ho FALINTIL-Forsa Defeza Timor-Leste (F-FDTL) Battalaun Norte, tersa ne’e halo enkontru preparasaun ikus ba serimónia solene komemorasaun loron 20 agostu ezistensia FALINTIL ba dala 48 iha aldeia Odelgomo, suku Ai-Asa, munisípiu Bobonaro.
Iha enkontru ne’e diskute liu kona-bá apoia ekipamentu, lojístika, akomodasaun konstruibuisaun no apoia téknika sira nune’e bele fahe tarefa servisu ba seksaun idak-idak hodi fó susesu ba serimónia solene hasa’e Bandeira nasionál iha fatin istóriku ne’e.
“Ami ohin enkontru ba dala-lima, ida-ne’e inkontru ikus liu ba preparasaun serimónia solene ichar Bandeira 20 agostu loron FALINTIL nian, ne’ebé preparasaun ba sub-komisaun organiza hamutuk ho F-FDTL atinje ona 25%, hein de’it iha loron ida rua ne’e, molok ba 18 ka 19 agostu ne’e nia atinje 100%,” Prezidente Sub-Komisaun Organizadora, Gilberto da Conceição ‘Beluli’, informa ba jornalista, sira iha Odelgomo.
Nia relata, kontribuisaun ba eventu ne’e mai hosi kombatente libertasaun nasionál sira hanesan vetaranu no mártir sira-ne’ebé hetan benefísiu hosi estadu no Dewan Solidaritas Mahasiswa Pemuda dan Pelajar Timur-Timur.
Iha enkontru ne’e, Koordenadór Bee Timor-Leste, Empreza Públika (BTL,E.P), Munisípiu Bobonaro, Adriano da Cruz, konfirma BTL prontu apoia tékniku hodi kanaliza Bee-Moos ba fatin serimónia inklui mellora sistema bee sira iha aldeia Odelgomo.
“Ita la’ós atu mai lori bee ba fatin ne’ebé ita destinji ba fatin atividade, maibé aproveita mós atu mellora sistema ne’ebé mak iha komunidade katak, depois ita fila sistema bee sira-ne’e bele hela ho sira ho di’ak,” nia promete.
Jerente BTL,E.P Bobonaro ne’e katak, bazea ba levantamentu ne’ebé ekipa tékniku sira halo hahú hosi Bee-Matan to’o fatin serimónia kuaze distánsia metru 1000.
“Ami hakarak hetan informasaun klareza hosi F-FDTL dehan iha mangeira rolu hirak mak prepara ona no hira mak seidauk, ami presiza informasaun klaru, atu ami enkamiña proposta ne’e ba BTL nasionál atubele kompleta,” nia katak.
BTL,E.P sei prepara saneamentu movel unidade haat atu instala iha fatin serimónia hodi responde ba nesesidade VIP partisipa no komunidade sira.
Koordenadór EDTL,E.P Munisípiu Bobonaro, Mário de Jesus, dehan EDTL mós prontu apoia tékniku halo instalasaun jeradór, maibé kona-bá materiál sira hanesan fiu, lampu no kombustível ne’e kabe ba responsabilidade komisaun organizadora nian.
“Ami hasai hela mapeamentu kasar, kona-ba fiu metru 800, lampu no fiting lampu unidade 100, tomada 15 no lampu sorot 10, kona-bá kombustível ami iha jeradór apoia hosi nasionál, ne’ebé sei to’o iha ne’e dia 14 ho pesoál ne’ebé ami sei koloka mai hamutuk na’in-16,” nia dehan.
Tuir Observasaun Agência Tatoli iha terrenu nota katak, dadaun ne’e mákina pezadu hosi Institutu Jestaun Ekipamentu Apoia Dezembolvimentu Infrastrutura, Institutu Públiku (IGEADI,I.P), Brigada Maria-Tapo ateru hela rai iha fatin konsentrasaun akampamentu FALINTIL Fronteira Súl no Norte.
Notísia relevante: Fatin konsentrasaun FALINTIL iha Odelgomo sei iha nakukun
Jornalista : Sérgio da Cruz
Editór : Evaristo Soares Martins
