SFJJ enfrenta difikuldade hodi garante efetividade no efisiénsia servisu
DILI, 09 agostu 2023 (TATOLI) – Vise-Ministru Fortalesimentu Institusionál, Paulo Manuel Remédios, hateten Sentru Formasaun Jurídika no Judisiária (CFJJ, sigla portugés), identifika kondisaun SFJJ sei iha problema internet ne’ebé iha kapasidade kiik no fasilidade ne’ebé ladún funsiona ho di’ak.
“Ha’u hetan konvite hosi Diretora Sentru Formasaun Jurídika no Judisiária, atu mai vizita iha Sentru Formasun Jurídika. Iha vizita ne’e, problema ne’ebé mak mak internet no fasilidade ne’ebé antigun dezde UNTAET nia tempu inklui problema rekursu umanu”, Paulo Manuel hateten ba TATOLI bainhira konklui halo vizita ba Sentru Formasaun Jurídika no Judisiária, Caicoli, tersa horseik.
Paulo Manuel Remédios, hateten programa IX Governu Konstitusionál ba tinan lima aprova ona iha Parlamentu fó mós prioridade ba kestaun internet atu rezolve liña internet iha teritóriu nasionál hodi bele rezulta servisu ida ne’ebé di’ak liután.
“Ha’u husu ba Diretór sira iha Sentru Formasaun Jurídika no Judisiária atu ajusta problema sira ne’e iha planu Orsamentu Jerál Estadu 2024 atu Governu bele haree hodi rezolve”, nia adianta
Iha fatin hanesan, Diretora Sentru Formasaun Jurídika no Judisiária, Marcelina Tilman, dehan ho vizita Vise-Ministru Fortalesimentu Institusionál Paulo Manuel Remédios nu’udar orgullu bo’ot tanba ho vizita ne’e bele rezolve problema ne’ebé agora daudaun enfrentadu.
Jornalista: Natalino Costa
Editór : Zezito Silva
